Boškarina - gamela.sikuti.hr

Vladimir Nazor

BOŠKARȊNA

(1910.)

Preveja štoriju BOŠKARINA, Vladimira Nazora (1876.-1949.),

na barbansko - orišansku čakavštinu i stavija naglaske na beside:

DENIS KONTOŠIĆ, mag.educ.

Trȋ pȗte, u trȋ sẽla, a sprȋd trȋ oštarȉje, nȁša se je noćȁs kumpȃr Zvȃne, brȋžan i sȃm, na naprȃšenen pȗtu ča pȅlja z grȃda u njigȍvo sẽlo. Z pȑve su ga oštarȉje potȉrali, z drȕge su ga na sȉlu zrȉvali, a z trȇte ga je oštȃr hȉtija vȁn z takȍvon fȏrcon da je kumpȃr trȕpija u zȅmlju kȁko kalȍtina.

Lȅža je nȉko vrȋme sprȋd te trȇte oštarȉje, ma je čȅsta tȓda paljarȉca, pȁk se pijȁni seljȃk dȉga z prȃha na nȍge ke ga nȉsu bȋle kapȁce nosȉt, nȅgo su mu popūšćȁle i zvrȁćale se. Za zaštȕpit se, bȉja je ti hȋp kumpȃr Zvȃne Grbljȉna: brȃda raskuštrȁna, nȏs speštȁn, ȍči mȗtne, a svȉ je bȉja bȅja kȁko da je z mȁlina zȁša vȁn.

Sforcȉva se seljȃk, za koraknȕt ča jȁče i sigurnȉje, ma kȁko da se je noćȁs svȅ ubrnȕlo prȍti njȅga. Nȉsu mu zdržȁla kolȉna, zalȇmbala se je spȍd njȅga zȇmlja, a z čȓnega tȓna i kupȉne zȕz čȅstu hodȉle su vȁn rȗke ke ga lovȇ i tȉraju ga hȋp dȇsnen hȋp lȋven plȍtu. Zvȃne stȅšo ni rasȓđen ni na kolȉna ni na čȅstu, pȁk ni na plȍt ča ga potȅže h sȅbi za mu lȋce zgrȅst. Znȃ on da se i najsirotȉji seljȃk morȃ tornȁt z samlja u sẽlo z vesȇljen u sȑcu i z kȃnton na ustȋ. Zasprȃvlje, danȁs je pokȕsija nȁpro ljȗtega i u kȍmunu, i na samlju, i u oštarȉjah, ma ćȗti da se jȕšto poštȅno ublȇmba, pȁk ča bi se sȁda sadȉja? Za ča bi unipȗt pȉja? – i kumpȃr se Zvȃne zmȁka znȏva tȓnju ȍštrega plȍta, rȉne lȇlajuć se po sredȋni čȅste, zdȉgne nȏs i zakantȃ:

• Oj, divȏjko, cvȋte mȏj,

drȋva z mȅnon uzȇt hȍj!

Ma, kȁko da se na njigȍv glȃs jȍš vȉše zakolȇmbala čȅsta, i stȍtine je ukodlȁki rȉnulo na njȅga z bodljȃtima prstȋ z plȍta…

Stȉja bi seljȃk z kȃnton rastȉrat tȗgu i potȉrat strȃh; zanȃša se i zijȃ:

• Sȁn si kȍtulu rastȑzala.

Dȃjte, mȃmo, ȉglicu,

Za zakȑpat kotulȉcu! –

• Si pijȁn! – jȃvljaju mu se glȃsi z tȓnja, a rȗke ga potȅžu na drȕgi plȏt. Natȇgle su ga, zabȍle mu nȍhte u ubrȁz, u lȁhte i bȅdra; držȇ ga čvȑsto ka i da su ud želȉza.

• Pȕšte me, vrȃgi! Ča ste se mȅne ulovȉli?

• Si pijȁn, Zvȃne! Šaputȁju ȏni u tȓnju i trȕpaju ga z grančȉcami.

• Nȉsan pijȁn, nȅgo sȁn brȋžan i sȉrota. Pȕšte me da grȇn dȁlje. Me čȅka dȍma mõja Bȃrbara.

Ma je sȁda jȁče zašȕškalo. Glȃve ud prȁsci je vȉdit mrȅž granȁmi, zȗbi se narugȉvaju, ȍči plamikȁju, cȁte ud medvȉda pȁdaju seljȃku na rȁmena. Glȃsi šȁpću:

• Kȗma Bȃrbara! A kȁdi su blȗze i facȏli ke si rȅka da ćȅš njȍj donȅst z grȃda? Kadȉ su šȏldi ke si dȍbija za krȁvu? Z čȉn ćȅš platȉt štȅuru, butegȃre i unȇ kȉn si dūžȁn? Će te nȁpro uškornjȁt kȗma Bȃrbara! Ne hȍdi dȍma, Zvȃne! Ćȅš spȁt z nȃs u plȍtu.

Ležȋ kumpȃr Zvȃne, povȃljen zȕz krȁj; nabȅčija se je i ždaljȋ u nȅbo.

Pȕni mȉsec je zȁša vȁn za gorȍn, i svȉtlost se razlȉla po drȁgi spȏd pũta. U vȅdroj nȏći cȑtaju se na blavȉlu mȃle glȃve ud brȋgi. Čanȇ se na njȉh bȍške; vȁmo-tȁmo bēlȇ se hižȉce – svȅ je fȇrmo i kȁko zaštrigȁno. Ma, činprȅsi i cȇri, ča su postrojȅni zȕz krȁj ud brȋgi, kȁko da su se noćȁs pomūtȉli: klȁnjaju se jedȁn drȕgemu, uvȋjaju se i sprȋd očȋ ud Zvanȇ tȃncaju kȁko pijȁne žȅne i prihitȉvaju se u štrȋge ke jȁšu mȅtle i letȇ prȍti mȉsecu. Glȅda Zvȃne u dolȉnu i štȕpi se magli ča se po njȏj rastȅže. I õna je pȕna nȇmira i se zavijorȁla; kalȁla se je za zdõlu, a ž nje se je pokazȃ zvonȋk ud sẽla, šiljȃt kȁko rȏg.

• To je nȁš zvonȋk! Sȁn vȁlje dȍma! – mȑmlja Zvȃne i rastȅže nȍge za koraknȕt na čȅstu.

• Frmȃj se! Ča ćȅš dȍma! – zašȕškalo je u plȍtu i drivȅne ga rȗke stȋšću jȍš jȁče.

Glȅda seljȃk kȁko se magla mȍta ȍkoli zvonȋka. Zkȕpila se i zdȉgla; ukazȁla je mȃlo sẽlo, cimȉtar z činprȅsi i lȍkvu i kȗs livȃde sprȉd crȋkve. Dȉže se svȅ vȉšlje, svȋjajuć se ȍkolo zvonȋka. Kolȏr ud srȅbra se zlȋva u škȗro lȕgasto, jedȁn njȏj prȁmen stȇga je prȍti zẽmlji četȉri stȗpca ka i četȉri nȍge, a drȕgi se je zaokrūžȉja pȁk se zvȋja i se stȉsa – spodobȃ glavi ud krȁve na vȇliken tȋlu. Glȇj, krȁva je ubrnȕla glȃvu prȍti seljȃku, glȅda ga i – bȗče.

• Boškarȋna! Vȋče kumpȃr Zvȃne i koporȋ se ča ud plȍta.

• Si pijȁn! Si mȗnjen! Šȕška čȓni tȓn, i ȕne rȗke mu trẽsu nȍge.

• Pȕšte me! Sȁd vȉdite? Sȁn je segȕtra prȍda na samlju za nȉš, a õna je ȕšla.

I seljȃk natȅže svȕ svõju fȏrcu; uslododȉja se je ud drȁče i tẽče po čȅsti. Tornȁla mu se snȃga; sȑce se zdȉglo, dȗša razvedrȉla, glava ubistrȁla. Ukodlȁki jȍš vȁjka zvirjȁju z tȓnja; čȕje kȁko kȑše grančȉce tēkȗć za njȉn lȋvo i dȇsno ka i vȇliki brẽki; ma Boškarȋna bȗče, a to ga junȃči. Zalȇla se je dvȃ-trȋ pȗt, udrȉja z nȍson u zȅmlju, ma nȉš za to; dȉga se je i – nȁprid! Za se rīšȉt ud ukodlȁki, plȍta i čȅste i za skrtȉt pȗt, rȉnuja je na krȃtko, drȉto prȍti sẽlu. Staza je pȕna kamȇnja, razdȅrena i stȓma, ma Zvȃni je sȁda nȉšto bȍlje: mȍre i pensȁt.

• Sȁn ja rȅka – govȏri u hȏdu – sȁn rȅka unȏj gospȏdi da Bȏg ȉma pravȋcu, da to ne mȍre tako fȉnit! Nȉsu mi je poštimȁli, kūpȉli su je za nȉš, zatȑli se me siromȁha, a õna njȉn je ȕšla; tornȁla se je nȁzad. Nȁpija sȁn se ud žȁlosti; napȁtija sȁn se ka i bȅštija, ma sȁd je svȅ pasȁlo.

Grȇ Zvȃne po stazi, kȑši nȍge po kamȇnju, grȇ z rukȁmi prȍti krȁvi ud ke mu se pričȉnj dȅla svȅ bistrȉji na misečȉni, na vedrȋni ud nȍći.

• Boškarȋna! Udkȉni se ud zvonȋka! Dȏjdi!

Kȁko da je blȃgo zasprȃvlje čȕlo glȃs ud seljȃka; ubrnȕla se, kalȁla se zdõlu po zvonȋku, pȍšla prȍti seljȃku.

Zvȃne se je frmȃ, topȋ se ud milȋne:

• Boškarȋna, blȃgo mõje!

Ma, ča grȅ krȁva vȉše zgõru, to je lȋce ud seljȃka vȉše u škȓbi. Ča je to! Kȃko grȇ to blȃgo, svȅ je mȁnje, svȅ je črnȉje, žȉvlje i vȉše bȋsno. Glȅda Zvȃne kȁko njȍj se rȍgi prihitȉvaju u ȕši; trbȕh se ugȉnje i nestȁje; bȏki njȍj se naravnȉvaju, vrȃt njȍj se krȃti, lȁloke se prihitȉvaju u glȃvu z očȋ ud ȗka, i z ustȋ z kȉh vȉsi jezičȉna ukrȗžena z zubȋ. Zvȃne je sȁda šȇrijo, usnītȉja se je, zkamenȉja – ȅko, sprȋd njȅga na stzi stojȋ sȁda čȓni brȅk i upȉre u nj z očȋ kȁko da bi ga stȉja žȋvega progȕtat.

Razočȃranje i strȃh su utriznȉli čovȉka. Stȉsa je nȍge, sȉlija se je stȃt za zgȏru na nogȁh, i stȉja bi ča mirnȉje zȑeć ča tȅn nȏven neprȇtelju.

• Znȃn ki si; vȅro ja da znȃn. Bašćȁn Furlȃnić, nemȏj me i ti sadȉt! Ma ča me svȅ ni danȁs kapitȁlo! Ko si ti Ȏrko, rȉvaj na drȕge, a ne na mȅne ki ti nȉsan nȉkad mȃj ča slȁbega načinȉja ili ča gȓdega rȅka. Su ti fȍši povȉdali da sȁn ti ja ukrȅja ȕnu bȁlu sȇna za blȃgo nakamȉt š njȏn? Ma, vȅruj, to nȋ ȉstina – pȁk ko bi to bȋlo, bȉš me za to noćȁs gonȉja kȁko bȅštiju i dȉga kȁko pȇrije u ȃriju, i najzȃd me hȉtija z visȍkega u kakȍvu jȁmu, kȁko da ja ne bȉn bȉja krstijȁn? Si čȕja, kumpȃr Bašćȁn, pȕš me da grȇn dȍma – ko i si Ȏrko, nȉsi hȕdoba paklȅna.

Tako govȏri seljȃk debȍto krȍz plȃč, ma brȅk se ne ugȉnje z pȗta; nagȁnja na Zvȃnu ki se ni mȁka aš znȃ da se sprȉd Ȏrke ne smȋ bižȁt da ga se jȍš vȉše ne razjȃdi. Znȃ kumpȃr Zvane da ta zȃla hȕdoba nȇće naȕdit kršćȅnoj dȗši svȅ dȍkle čovȉku ne skȍči mrȅž nȍge, pȁk se svȅ mȕči i napȉnje za he držȁt skȕpa. Bȅn, jȕšto su noćȁs te njigȍve nesrȉćne nȍge najvȅći šašȋn. Stojȋ seljȃk blokȁn na srȋd stazȇ sprȋd čȓnega brẽka, ma mu se tȋlo kolȇmba; glava mu popȗšća i klȉma ka i prȃzan cȕk na kõlcu u srȋd žȋta. Najedanpȗt mu se zaparȁlo da se je zẽmlja ubrnȕla ȍkolo njȅga; zajōkȃ je, zalȇla se je i rašīrȉja nȍge za ne pȁst; ma prȉja nȅg će se jȍped složȉt, čȕja je da mu je nȉšto skočȉlo mrȅž nȍge i da ga je zagrȁbilo za bȅdra, pȁk rȕknulo ka i bakȋn i se nȁdulo ka i mȋh i dȋglo ga u vȋs.

II.

Visȍko u ȃriju nȍsi Ȏrko kumpȃra Zvȃnu Grbljȉnu. Ležȋ seljȃk na trbȕh na hrbȁtu čȓnen brẽku; stȋšće z nogȁmi trbušȉnu ud brẽka, z prsȋ nȁgnjen na živȍt ud Ȏrke, držȋ se u gȑču za rȕnjave ȕši. Frmȉva dȋh i zapȉre ȍči aš čȕje da bi mu se ko ne zavrtȉlo u glȃvi, pȁk bi se sfȗza po kȍži ud tȅga dȋva i zrȕšija se z nȅba na zȅmlju. Letȉt, ȃrija i vȉtar ča mu tȗče u lȋce i razbotunȁna pȑsa, razvodnjȉva u glavi ud seljȃka i zȁdnje pȃse dȋma ud vȋna ko ga je danȁs tako ljȗto kojenȁlo, namȉsto da ga pomilȕje i razvigurȃ. Čūpȋ Zvȃne na brȇčljen hrbȁtu, stȉšće ȍči kȁko upȁren mačȁk, i pensȃ za svõju nȏvu nesrȉću.

Vȉše ne trȉba sūmljȁt: pijȁn ni, pȁk svȅ to ča ga sȁda kapitȉva ni sȁnj nȅg je zasprȃvlje. On jȁše na Ȏrki, unako kȃko je čȕja da su i nȉki drȕgi nesrȉćni u njigȍven sẽlu nȉke pȗte jȁhali. Ma, ki je ti Ȏrko? Ča zasprȃvlje Bašćȁn Furlȃnić, ȕni krȕljasti njigȍv susȅd ki ga napȁda da mu je ukrȅja spȑtu sȇna? Kušeljȁju težaki da se Bašćȁn prihitȉva čȕda pȗti u brẽka, pȁk da rȉva na nrȍd na pũtu po nõći. Ma, Ȏrko je i stȃri Mȋćo Šatȉna i zvonȃr Bȅpo. A uvȃ dvȃ z kumpȃron Zvanȍn kuntȇnto bȕdu u kumpanȉji, zogȁju i pĩju; zȁšto bi ga ȏntar noćȁs mȕčili? Gȏbasti butegarȉć šjȏr Tȏne, ti je stȅšo na glasu ka i Ȏrko i ud Zvanȇ najtȑdlji neprȇtelj. A jȏh je mȅni, ko sȁda sidȋ na šjȏr Tōnȉnen živȍtu. Lȅdeni pȏt je ublȉja seljȃka kȁda je to propensȃ. Stȋšće kolȉna, gȑči šȁke, bȅči ȍči.

Brȅk je rastȇga vrȃt i rȋlo, ubrȁća z jezȉkon, vȅsla z nogȁmi i plȉva po ȃriji kȁko rȉba u võdi. U svitlȋni ud misečȉne rastȅže se spȍd seljȃka drȁga. Ravna je ka i dlȁn, škȗro-blȃva ka i mȏre kȁd pȗše pȑva bȕra ud pozȋmka, a po njȏj se laštȋ i zavrȁća strȕna.

• Kȁd bi me almȅno hȉtija u vȍdu! Bi bȋlo mȅklje – pensȃ Zvȃne.

Čȓni brȅk, ki je unȃko nȁdut spodobȃ na kõnja speštȁnega hrbȁta, krȃtkih nȏg i rȇpa i ȍštrega rȋla, letȋ sȁda svȅ na nȉžlje prȍti ȍblakan ud dȋma ki rȉvaju z bȍške zȕz strȕnu.

Sȁda se bravȉje razaznȉvaju hižȉce rashȉtane po drȁgi i dȇbla na sinokȍšah. Letȇ ȏni na nȉžlje, ma strȃh ud seljȃka je svȅ vȅći. Tȍpole rȉvaju prȍti njȇmu kȁko kȏlci, jȍš hȕje kȁko ražȁnj posȃjen totȅka za ga dočȅkat kȁd pȁde i probõde ga jȍš žȋvega; rasȗšene lȍkve zȋšu spȏd Zvanȇ kȁko ȗsta ud dibljačȋne, prȏnta za ga progȕtat; a prȁmeni ud maglȇ, ča se jȍš natȅžu po dolȉni, lovȇ fȗrme ukodlȁki ki dȉžu glȃve i čȅkaju da njȉn seljȃk pȁde u nȁručlje.

• Pomȏri Isȕs i Marȉja! – šaputȃ seljȃk i stȉja bi se prikrīžȉt, ma su mu se rȗke takȁle za ȕna vȇlika ȕha; ne mȍre nȁnke z pȑston maknȕt.

Ȏrko letȋ; bȍška je svȅ blȉže. Dȉm se vrtȋ ȍkolo kumpȃra, kȍlje njigȍve ȍči, gȗši mu gȑlo.

• Će me hȉtit u vȍganj, će me žȋvega spȅć! – narȉče seljȃk.

Pȁk se jȍped zdȉga i mȁlo pomȁnje letȋ. Fȅta dȋma šȋri se spȍd Zvanȇ, a spȍd tȅga lȕgastega vȅla vȉdi on svȉh čudȇsi.

U mȏru spȍd sȅbe vȉdi seljȃk čȕda tȅga za se zaštȕpit. Ni vȉše bȍške spȍd vȅle ud dȋma – samȁnj je to sȁda, ma jȕšto unȋ na kȅn se je segȕtra Zvȃne ražalostȉja. Glȇj, unȋ svȇni težaki, svȇno blȃgo, svȇni narȍd ča kupȕje i trapulȇri, pȁk i ȕna svȇna gospȏda ud komišijȗna za dȁt prȇmje za bake i krȁve ke dȁju mlĩko. Štȕpi se seljȃk aš vȉdi u svȅn tȅn štmȍru i sȅbe sȃmega – ja, jȕšto sȅbe kumpȃra Zvȃnu Grbljȉnu, u lȕgasten šiljȃru ča ga je kūpȉja lȃni u Pũli, i u nȏven mȏdren vištȉtu ča mu ga je njȉgova žẽna Bȃrbara skrojȉla – kadȉ pȅlja prȉko dritȋne svõju Boškarȋnu. Svȉ ljȗdi na samlju su ubrnȕli glȃvu prȍti njigȍvoj mȑšavoj krȁvi. Glȅdaju je zaštȕpljeni, štȕpe se i podsmihȉvaju. A on – ja, jȕšto on, aš vȉše ni pijȁn i zdrȁve ga ȍči ne kojenȉvaju – potȅže dȁlje krȁvu, grȇ blȉže barȁki u kȏj su gospȏda ud komišijȗna i ki glȅdaju tȇnđeno i lȋpo blȃgo mrȅž kȉn će zibrȁt unȏ ko će dobȋt nȃgradu. Dičȉna i unȋ ča kupȕju vrtȇ se ȍkolo Zvanȇ i njigȍve Boškarȋne i zvirjȁju u krȁvu kȁko u nȉšto čȅn se trȉba zaštȕpit. Dȉca švȋću, butegȃri trȕpaju u smȋh. Boškarȋna se je stȉsla ud sramōtȇ, kalȁla je glȃvu i rȇp, a seljȃk je srdȉt. Glȅda Zvȃna z škȗrega kȁko ȕni drȕgi Zvȃne dȍli na samljȉšću mȃše z rukȁmi, vȋče i kȗne, i potȅže krȃvu svȅ do plotȋća sprȉd barȁke. Gospȏda ud komišijȗna kȁko da su danȁs ud nȉke srdȉte vȍlje. Vitrinȃr, kȁko pȁrat komišijȗna za agrȁje, kȁko prȇsjednik komitȇta ud cȋle rȇgije i podeštȁt ud grȃda, smȋju se i rȗgaju njigȍvoj krȁvi i mȃšu mu da ne škercȃ i da se mȁkne ča ud barȁke; sȁmo trapulȇr Mȏmolo glȅda u Boškarȋnu, treputȁjuć z očȋ i natȅžuć z prstȋ unȉh pȃr dlȁkic zgȏr ȕsnic. Zvȃne se ne želȋ predȁt, nȅg hȉta pȑsa nȁprid, dȉže glȃvu, mȃše z rukȁmi kȁko vȉtrenjak z krȅli i svȅ nȉšto kušeljȃ i kušeljȃ, kȁko da bi na svȅ fȏze stȉja ti komišijȗn natentȁt, ud njȅga nȉšto sprosȉt, pȁk debȍto he na nȉšto i sforcȁt. Butegȃri se po tȅn vȉše rȉvaju prȍti njȇmu za mu se vȉše narūgȁt, a dičȉna su zaplēsȁla ȍkolo Boškarȋne - zagospodarȉli su štrmȍr i konfužjȏn. Skočȉlo je ȏntar nikolȉko stražȃri, pȁk rastȉralo svȉ narȍd ki se tȁmo napeštȉva, trȕpilo z nogȁmi krȁvu u bȍke i rȉnulo ča Zvȃnu.

Letȋ Ȏrko dȁlje prȅčuć z nogȁmi zgȏr lȕgaste sȁpe. Spȏd vȅla ud dȋma vȁjka je škurȉje. Ni vȉše vȉdit samȁnj. Na dnȏlu ud tȅga mȏra vȉdi sȁda kumpȃr Zvȃne zȁdnje hȉže ud grȃda u svitlȍsti zȁdnjih trȃki ud sunčezahȍda. U na po škurȋni upȁzija je jȍped svȏj litrȁt i vištȕru kadȉ škȗr i žȁlosan sidȋ pȍli oštarȉje i zvirjȁ u Boškarȋnu ka stojȋ zȕz njȅga. Glȇj, sprȋd seljȃka je najedanpȗt doletȉja čovȉk z šȅgovima vočȋ – šjȏr Mȏmolo. Dȍša je blȉže seljȃku, potȕcka ga je z rukȏn po plȅći, nȉšto mu govȏri. Znȃ kumpȃr Zvȃne ča unȏ šjȏr Mȏmolo govȏri sȁda njigȍven litrȁtu i vištȕri, dȍli spȏd vȅla ud dȋma – tȅr i njȅga je večerȁs stȃ šjȏr ma jȕšto na svȇnen pũtu, sprȋd ȕne svȇne oštarȉje, pȁk ga trȕpija po rȁmenu i pȍčeja mu govōrȉt. Rȅka je da mu ga je žȃ, aš da znȃ kȁko je kmȅt Zvȃne nesrȉćan i siromȁh. Zȁšto je tȃko zapuštȉja krȁvu? Takȍve krȁve ne smȋdu ni orȁt ni potȅzat, i jȍš je seljȃk nju dopȅlja na samȁnj i sprȉd komišijȗna, pȁk nȅka mu se svȋt rȗga.

Ža je to svȅ šjor Mȏmolu, aš da je kumpȃr Zvȃne imȃ vȉše sȍli u glvi, bȉja bi drugȃšlje tȇndija krȁvu, pȁk bi seljȃk bȉja sȉgurno ulovȉja prȇmju za rīšȉt stȃri dȗg za kȇga će on, šjȏr Mȏmolo, prȉja ȅli pȍkle, morȁt Zvȃnu dȁt na sȗd. Nȉš za to, će ga počȅkat jȍš mȉsec dȃn – vȉše ne mȍre nȉkako. Šjȏru Mȏmolu je ža seljȃka, ne bi stȉja da se Zvȃne večerȁs tornȃ dȍma z prȃznima rukȁmi i u sramȏti, ne bi stȉja da žẽna vȋče z gdȉn na njȅga ka se prȅz drȕge uzȉre dȃru ud mȗža – ȅko, kūpȉt će on ud njȅga tu nesrȉćnu krȁvu. Će mu trȉbat za peljȁt sȇno, aš mu je prikučȇra krepȃ tovȁr. Nȕdi mu za krȁvu trȋ srȅbrna kragȗlja, a četȓti mu regalȉva za lȁglje pribolȉt danȁšnju sramȏtu. – To sȁda govȏri šjȏr Mȏmolo Zvȃni – hlȃdu, a seljȃk se je složȉja, dȉga se je i ȕzeja šȏlde, bukȉva Boškarȋnu u čȇlo i rȉne u oštarȉju za zagūšȉt u vĩnu jȃd i tȗgu svõju.

Ȏrko je zanjȓga ka i kȍnj, dȉga se visȍko u ȃriju i udrȉja na drȕgu bȃndu. Zaželȉja se je brȅk preletȉt prȉko pȍlja, zajȁhat kakȍvu krȁsu na pozgorȋci i ulovȉt se brȋga za zgȏru.

• Sȁd će me – šȁpće kumpȃr Zvȃne i stȋšće jȍped vȍči, aš pensȃ da će tako almȅno u svȇten mȋru bȉt ubijȅn.

Brȅk je rastȇga nȍge, dȕge kȁko ȃrbuli na brȍdu, tȁnke kȁko kõlci, a svȁka na trȋ zglȍba kȁko unȇ ud mȕhe, pȁk letȋ po pozgorȋci ud brȋga.

Ȏrko-brȅk se prihȉtija u Ȏrku-pȁuka.

U mȗnjenen tȓku preletȉla je hȕdoba svȅ brȋge naȍkolo drȁge, a kȁd je dȍšla na kȗk zgȏr sẽla ud Zvanȇ, prihȉtila se je jȍped u brẽka i trȕpila po ȃriji prȍti zvonȋku ud sẽla ki, u svitlavȋni ud mȉseca, hȉta prȉko plȁce i hižȋc debȅli hlȃd.

III.

Mȉsec se kalȉva uzȃd brȋga. Z škarpȃd po drȁgi rȉvaju patȍki hlȃda; razlȋvaju se po sinokȍšah, pȑte se po pozgorȋcah, dȅlaju povȏdnju u dolȉni. Svȅ grȇ na jȍš šakretȉje u tȏj uštrigȁnoj nȏći. Vȇlika vȏda dȉže se ka i mȏre spȏd tȋri ud jȕga, zabȃda se u klȃnce, gȕta krȁse, plȁzi po bȏki ud brȋgi. Kȁko da sȁje rȉvaju z dimbȋne za požerȁt dolȉnu. Svȕda pustȋnja i škurȋnja; jedȋno je mȃlo sẽlo ud Zvanȇ jȍš vȁjka u svitlavȋni ka i po dȃnu. Svȅ je kȁko blokȁno i zaštrigȁno u sẽlu: sȁmo su četȉri topȍle na kantȗni hȉže ud Zvane takȁle treputȁt z lȋšćen i trȇst z granȁmi. Zaškūrȉle su ka i hrȃsti ki ȉmaju stȏ lȋt, u sredȋni su pȍšli na ukrȗglo, dȍbili su jedȁn rȏg na vȓhu, stȇgli su jȍš jȇno dȇblo prȍti zẽmlji i protȇgli h hȉži ud seljȃka po dvȋ grȃne ka i ručetȉne. Ja, četȉri dȋva stojȇ sȁda na kantȗni ud hȉže i glȅdaju u Ȏrku ki stojȋ fȇrmo u ȁrji zgȏr njȉhovih glȃv z kumpȃr Zvanȍn na hrbȁtu. Brȅk je zalȁja, a dȋvi su zgrȁbili četȉre kantȗne ud krõva i digli ga u ȃriju.

Hȉža ud kumpȃra Zvanȇ je pȕna narȍda ka i šīpȁk zȓnja. Se vȋče i se štrmorȃ. Svȉ se rȉvaju ȍkolo kȗme Bȃrbare ka sidȋ na ognjȉšću, tẽču njȍj sȕze na patȍke i skrȋva lȋce za ne glȅdat svȉ ȕni svȋt. Raspoznȉva Zvȃne svȁ ta lȉca: to su unȋ kȉn je kumpȃr dūžȁn, a mrȅž njȉma je i Kȇko, pȑvi hlȁpac ud šjȏra Mȏmole, pȁk onipȗt cȋla čȅta unȉh za štȅure, unȉh na sȗdu, hlȁpci i gvȃrdije, finȃnci ud kȍmuna, mȃlih pisȃri pȍli ukȁti i lȕgari. Vȏjska ud njȉh rȉva na žẽnu i ȉšće ud nje da njȉn plȃti dȗge, štȅure, glȍbu, mȃnču, za spȍd rukȇ i ča ti ga ja znȃn, a Bȃrbara jȏče i he prȍsi da ȉmaju mȁlo pacijȇnce. – Dȏjt će Zvȃne z samlja, donȅst će prȅmju, aš je njȉhova Boškarȋna mirȃkulo ud krȁve, pȁk će platȉt; dȁt će njȉn on cȋlu prȅmju, a ko bȕde rabȉlo i košȕlju z sȅbe i njõje srȅbrne rančȋne, kȍtule i nȏve pastȍle – tȅr njȉh dvȃ nȋmaju strȃha ud sirȍšćine dȍkle njȉn je žȋva i zdrȁva njȉhova krȁva Boškarȋna. – Tako kušeljȃ kȗma Bȃrbara, ma ȕni mȑski Kȇko, hlȁpac i prȍdana dȗša ud šjȏra Mȏmole, trȕpija je u smȋh i zijȃ na nju. Kakȍv Zvȃne, kakȍva prȇmja, kakȍva Boškarȋna! Zvȃne se je nȁpija noćȁs ka i čȅp, i Ȏrko ga je ponȅsa na Ȕčku, za ga hȉtit u kakȍvu škarpȃdu. Prȇmju je dȍbija segȕtra nȉki drȕgi; njȉhovoj Boškarȋni su švīkȁla dičȉna na samlju. Zvȃne je prȍda tu svõju sramȏtu za tri srȅbrna kragȗlja, za ke sȗmlja Kȇko da će mu Bȃrbara nȃjt nȁnke jenȅga u žẽpu, ko mu jȕtri pȏjde nȃjt razbijȅno mȑto tȋlo, aš je lȍka noćȁs po oštarȉjah.

Bȃrbara je skočȉla na nȍge ka i da je zmȉja je ugrȉzla. Prȍda je Boškarȋnu? Ni u svȍj Ȉstri zlȃta ko bi je platȉlo. Ča je unȉh sȅdan tȇnđenih krȃv ča he je krȃlj glȅda na pȁšah ud Žȉdi, prȍti Boškarȋni? Ni pȍša Zvȃne segȕtra z krȁvon u grȃd za je prodȁt, nȅg sȁmo za dobȉt prȇmju za nju. Lȁže Kȇko, pȍredan kakȍv je. Zvȃne će za ki hȋp dȏjt dȍma, i svȅ će bȉt jȍped u mȋru i kuntentȁno.

Svȉ unȋ svȋt rȉva na žȇnu; rȗga njȍj se i kȗne. Kȁda je ȏna rȅkla da nȋma nȁnke proškuljȁnega šȏlda, zamīšȁla se je štrȍpa kȁko rȏj ud čȇl kȁda hȉtiš grȍtu u njȉhovu kašȅtu; takȁla je grȁbit i pustošȉt po hȉži. Razmontȁli su pȍstelje, dȍprli i zvrnȕli kasȅle, kalȁli črȉpnje z zȋda, komȍštre z verȗg, svȋće i lemȅš z štȕka, pȁk navalȉli u štȁle i konȍbu za potombulȁt u kȍrat bȁčve i tȋnje, za zvrnȕt kȗlu i ponȅst vȁn kȁmenice, brȇnte, kȃble, sȇno i gnjȏj. Ustȁla je hȉža gȏla i pȗsta. Jȍš je čȕda njȉh golorȕkih, pȁk vȁde vrȃta, gȗle talȋre ud brkȗni; a kȃko je hȉža uzȋdana z grȍton, ulovȉli su palankȋne i štrangulȋne, pȁk rȕše zȋde: hȉtaju dȍli, kȑše, kȃlaju i nȍse ki prȁg, ki grȇdu, ki grȍtu, ki dȁsku. Spodobȃ hȉža ud kumpȃra Zvanȇ na kȕp ud mravnjȃka kȁd unȏ navȃli võjska ud mravȋnci za ga svȅga raznȅst. - Ni vȉše hȉže, ka i da je šilȗr ponȅsa je ča: svȅ je pȗsto, sȁmo kȗma Bȃrbara sidȋ na razrȕšenen ognjȉšću i narȉče ka i kȕkovica.

• Sȉrota mõja Bȃrbara – vȋče Zvȃne z visȍkega.

Žȇna se je trȅnula, skočȉla na nȍge, skamenȉla se ud mirȃkula. Pȁk se Bȃrbara ubistrȃ:

• Sȁn rȅkla ja da Kȇko lȁže! Si ti to, Zvȃne, na nȁšoj Boškarȋni? Su te napastȍvali po pũtu, pȁk se dogodȉlo mirȃkulo i si zletȉja po ȃriji. Dõjdi, Zvȃne; dõjdi dȍli! To je svȅ nȉš kȁd nȁn Boškarȋna ni ubijȅna. Ćȅmo učinȉt š njȏn nȏvu hȉžu. Na, na, mõje blȃgo!

• Pomūtȉla mi se je žẽna! – jȅca Zvȃne na živȍtu ud Ȏrke, a čȓni se brȅk pomȁlo kalȉva prȍti kȗmi Bȃrbari da ga žẽna bȍlje vȉdi.

Bȃrbara fišȃ u Ȏrku, čamȑdi čẽlo, kambijȉva se u lȋcu i zijȃ:

• Zvȃne, gnjȗs! Si je prȍda, ča ne? Si nȁs zatȑja! I Bȏg te je kaštigȃ: nȁpija si se; ulovȉja te je Ȏrko… Pȁk, nȅka te nȍsi, kȁd si takȍv. Zvȃne, gȁde!

Sȓdi se i zijȃ žȇna ka i dȋblja. Ȏrko držȋ seljȃka zgȏr njȏje glavȇ, a kȁd je i njȅga zagljȕha škȋk ud ženȇ, dȉga se je jȍped zgȏru, zaronȉja u škȗro.

• Nȅka te ja, niškorȉsti! – Krepȃj kȁko brȅk! Da ne bȉš noćȁs prihȉtija, Zvȃne, lȋvu z dȇsnon i dȇsnu z lȋvon! – čȕt je kȁko žẽna škičȋ.

Kumpȃr Zvȃne letȋ u škūrȅn. Ne vȉdi vȉše zvȋzde na nȅbu ni vȍganj na zẽmlji; ne čȕje nȉš drugo šūmȁt nȅg ča je klopotȁt nȍge ud brẽka, a ćȗti da će sȁda bȉt zȁdnja ȗra aš ga Ȏrko nȍsi h drȁgi. Nȉkada do te nȍći ni zadȑhta kumpȃr Zvȃne ud pensȋra na smȑt i ni čȕja žȅlju za se škapulȁt i za žȋvȉt, kȁko u uvȅn zȁdnjen hȋpu. Znȃ da je za njȅga svȅ fȉnilo, da je ruvinȁn, da mu je smȑt jedino spasȇnje ud ufȇže svȋta, ud lȍva unȉh kȉn je dūžȁn, ud pȏjt pekljȁt, ud glȃdi, žȇje i zīmȇ, ma žẽna mu želȋ smȑt, i jȕšto porȁdi tȅga kumpȃr Zvȃne nȇće umrȋt, nȇće zgȉnut.

Vȋkla mu je: „Krepȃj ka i brȅk! Ne prihȉtija noćȁs lȋvu na dȇsnu ni dȇsnu na lȋvu!“ i seljȃk pensȃ kȃko bi ȏntar – mȍga bi načinȉt svȅ protȋvno nȅg to želȋ njigȍva žẽna Bȃrbara, z tȉn vȉše ča ti pȗt ȉma vȅće škȗže za je ne poslȕšat i za je razjdȉt. I blȉže smȑti držȋ se kumpȃr Zvȃne unȅga svojȅga: Načȋni jȕšto unȏ ča tvõja žẽna ne želȋ da načȉniš, pȁk će ti dõbro bȉt! – Znȃ kumpȃr ča bi sȁda bȋlo protȋvno ud unȇ: „Krepȃj kȁko brȅk!“ – bȍga vȅro: škapulȁt se i žīvit ka i bubrȉg u lȏju. Ma mu ne grȇ za rukȏn ugȃnat ča je stȉla rȅć z unȉn: „Ne prihȉtija noćȁs lȋvu na dȇsnu ni dȇsnu na lȋvu!“

Hȕdoba letȋ, a Zvȃne čūpȋ na hrbȁtu ud brẽka i napȉnje mȍždane za pȏjt u slȋd tȉh besȋd. Sprȉd smȑt živȍt ud Ȏrke ga ne držȋ unko čvȑsto kȁko prȉja: fȏrca je popuštȉla, fȍši fatepȍšte, da bi ga brȅk lȁglje strȇsa z živȍta i hȉtija u drȁgu, pȁk se kumpȃr Zvȃne svȅ lȁglje mȉče na unȅn hrbȁtu. Na šȅgavo i pomȁlo, da se hȕdoba ne domȉsli, kambijȃ je dȇsni rukȃv z lȋvin, zȗka je jakȅtu i ubȗka je znȏpako. Rivȃ je najzȃd načinȉt svȇno i z svojȉma širȍkima bragȅšami, ma Ȏrko stȅšo letȋ, i jȕr se u škūrȅn bēlȇ grȍte na dnȏlu ud drȁge.

• Prȍkljeta bȁba! – zdȉsa je kumpȃr Zvȃne. Kojenȁla me je i ti pȗt.

Kamȇnje na dnȕ vȁle pričīnjȁlo se je seljȃku ka i zȗbi ča rȇstu u škurȋni.

• Ja, škȏrnje! – šȁplje kumpȃr.

Dȑščuć ud strȃha i naprȅžuć se da ne zgȕbi kontrapȇzu, zȕja je seljȃk škȏrnje, pȁk he jȍped ubȗva, ma kambijȉvajuć lȋvu na dȇsnu; ulovȉja se za ȕši ud Ȏrke i upȉre z očȋ u dimbȋnu spȍd sȅbe ka sȁda dopȉre svõje ždrȋlo jȕšto spȏd njȅga.

Brȅk se je frmȃ, lȁje i trẽse z glavȏn i z živȍton, jȕšto unako kȃko dȅla brȅk kȁda zȃjde z vodȇ. Kumpȃr Zvȃne se ni mȁka.

Ȏrko bȗče, gȑči se, poskakȉva, trẽse i dȑma z tȋlon. Kumpȃr Zvȃne jȁše na njẽmu ka i konjanȋk i trȕpa u smȋh.

• He, he, šjȏr Tȏne, vȁs je kojenȁla kȗma Bȃrbara, mõja žẽna! Ča nȉste znȁli da kȁd se kambijȃ na Ȏrki lȋvu z dȇsnon i dȇsnu z lȋvon, da on, Ȏrko, zgȕbi mȏći i morȃ slūžȉt unȅn ki ga jȁše? Ej, šjȏr Tȏne, ča ćȅte mi dȁt da vȁs ne mȕčin svȅ dȍkle pȅtehi ne zakantȁju, i da vȁs vȁlje pȕštin na slobȏdu?

Brȅk stojȋ fȇrmo u ȃriji, ne mȉče se. Krȍtak je kȁko jȁnje. Piskutljȉvi glȃs je dȍša do ȕha ud seljȃka.

• Zvȃne, ću te popeljȁt u motovȗnsku bȍšku kadȉ je zakȍpano zlȃto, svȅ benečȃnski cekȋni.

• To su tȃti skrȉli. Ga nȇću.

• Ću te popeljȁt na Ȕčku kadȉ plȇšu vȋle, nȅka te prihȉte u mladȋća.

• Sȁn već dosta žīvȉja.

• Ću te ponȅst u Benȇce da he vȉdiš; ću ti darovȁt ȗru ud zlȃta; ću ti dȁt jȅnu trȃvu, pȁk će ti Bȃrbara rodȉt sȋna.

• Ne, nȅgo ću ja prȇmju za Boškarȋnu! Ja ću da mi tornȁju čȃst i poštȇnje.

• Ma, jȕšto to ne mȍren. Krȁva ti je za nȉš.

• Pȅljaj me u grȃd! Želin vȉdit komišjȗn i Boškarȋnu! – vȋče seljȃk i trȕpa Ȏrku z nogȏn u trbȕh.

Hȕdoba letȋ prȍti gorȁn u sunčezahȍdu.

IV.

Širȍka okrȗgla valȃda ležȋ spȍd kumpȃra Zvanȇ. Vrhȋ ud brȋgi ulovȉli su z zȗbi ud grȍte nȅba naȍkolo.

• Dȍli u grȃd! – zapovȋda seljȃk Ȏrki.

Vȓhi ud brȋgi se dȉžu u vȋs; ȏni propȁdaju u škurȋnu ka je svȅ črnȉja. Zvȃne glȅda kȁko grȇ svȅ na ȕže ȍbruč ud muntȃnj zgȏr njigȍve glavȇ; škičȋ prestrȁšeno: „Pȅljaš me u pakȃ“ i trȕpa z nogȁmi Ȏrku nȅka se jȍped dȉgne. Poslȕšna se je hȕdoba frmȁla i takȁla drugȃšlje vogȁt z nogȁmi, ma jȕšto ti hȋp se je čȕlo nȉki posebȏjan glȃs. Dȍli z vȇlike dubočȋne, z brȋgi naȍkolo ȅli z nutrȋnje ud zemljȇ, čȕje se jȃko būkȁt, pȁk se jȁviz rastȇga po valȃdi. Vȃl kȇga ne vȉdiš je pljȕsnuja u zȋde ud jamurȉne. Zbūdȉlo se škȗro, mȑto mȏre; debȍto čȕješ kȁko se prikȉdaju kõnci na tȋlu ud nȍći.

• Boškarȋna! – zijȃ seljȃk i gȍni jȍped Ȏrku prȍti dnȏlu ud valȃde.

Ȍkolo kȗle, zgȏra jamurȉne, napeštȃ se mȃli gradȋć. Vȉje, čȅste z drȕgih mȉsti, pȗti z sẽla i staze z barȃk u pȍlja finjȉvaju kȁko natȇgnjeni kȏnci u kȏrtu sprȋd kȗle. Pričȋnja se kumpȃr Zvȃni da glȅda mrȉžu ud pȁuka: kȗla-pȁuk črnȋ se u srȋdi, a svȅ su te hȉže, barȁke i kolȉbice, odȅka vȅć scikȁne, tȁmo jȍš zavijȅne u spaučȋnu.

Pȁuk-kȗla stražȃri u nȏći. Hrbȁt mu stršȋ u vȋs, a njigȍve ȍči hȉtaju svȉtlo na vȑta zȕz jamurȉnu.

Četȉri kumpȁnja sidȇ spȏda znadstrȉha za bȃnkon. Svȉ ud komišjȗna za premjȁt bȃke i krȁve mlȉkarice feštȁju noćȁs pȍli šjȏra Mȏmole ki je nȁpro vȅseja ča je njigȍva krȁva Rȍša dȍbila danȁs pȑvu prȇmju. Šjor pȑvi ud ȏdbora za kampȁnju, podeštȁt i vitrinȃr spomȉnju ȕnu mȑšavu i gȓdu krȁvu ku je segȕtra niki seljȃk dopȅlja sprȋd komišjȗn na vȇliku sramȏtu i škifȅcu.

• Unȃ je krȁva, gospȍdo mȏja – govȏri njȉn podeštȁt – vȇri litrȁt i šȅnj fȏrce ud imȃnja uvȅga narȍda.

Vitrinȃr sȓče terȃn i govȏri:

• Šjȏr Mȏmolo je kūpȉja ud seljȃka Grbljȉne tu smȉšnu krȁvu, sȁmo za pomȍć težȃku.

Gȍsti fȃle i zdȉžu gospodȃra, a on dȉže mižȏ u zdrȃvlje prȇsjedniku. Debȍto plȇše ud srȉće ča mu se prȉzna da je čovȉk ki se udrȉče za siromȁha.

Šjȏr Mȏmolo je umȕka, mižõli su zazvonȉli za zȁdnji pȗt, i šjȏri su se ustȁli.

Ma, jȕšto ȏntar se je čȕja štrmȍr sprȋd plȍta ud vȑtla.

• Počȅkajte me! – vȋče nikȋ sidȇć na hrbȁtu blȃga kȇga šjȏri nȉsu mȍgli vȉdit, ma bi rȅć da vȉše spodobȃ na brẽka nȅgo na kõnja.

Z tȅga je blȃga, ko ȉma strȃha ud svitlȍsti, pȁk se rȉva nȁzad, nikȋ se kalȃ, zatȅka prȍti plȍtu, priskočȉja ga i kapitȃ sprȋd bȃnka.

• Ti si to, kumpȃr Zvȃne? – govȏri šjȏr Mȏmolo.

A kumpȃr Zvȃne Grbljȉna, z raskuštrȁnin bradȕcon, z krvȃvin nȍson, naprȃšen i mirakulȏžo ubučȅn, treputȃ z očȋ, kȍpa z rukȁmi po žēpȋ, vȁdi nikolȉko kragȗlji pȁk he je hȉtija na bȁnak.

• Zvȃne, si pijȁn ȅli mȗnjen?

• Ni pijȁn, ni mȗnjen, šjȏr Mȏmolo! Nego sȁn dȍša da mi dȃte prȇmju ȅli da mi vȓnete nȁzad Boškarȋnu.

• Ki dibljȃk! Ki farabȕto! – štȕpe se gospȏda.

• Ma, čovȉk Bȍjži – mȋri šjȏr Mȏmolo seljȃka – prȇmju je dȍbila mõja Rȍša, a Boškarȋnu si mi prȍda!

• Ča je njȉhova Rȍša dȍbila prȇmju? To ne grȇ, šjȏr; to ni prȁvo! Da ȏni dȍbiju svȅ ȕne bȇče, a ja nȉš? Ča su se ȏni fȍši trūdȉli pȍli njȉhove Rȍše kȁko ja brȋžan pȍli Boškarȋne? Najprȉja, ȏni su kūpȉli tu krȁvu u furȅštoj zẽmlji, a Boškarȋna je nȁše domȃće blȃgo; nju je zlȇgla Belȕsa ku je kupȉja mȏj pokȏjni utȁc na Porȇšćini. Ȏni ȉmaju lȋpu štȁlu i čȕda sȇna i čȕda hlȁpci ki njȉn glȅdaju blȃgo; i mȍru špendȁt za medežȉju ko je blȃgo ubolȉlo; mȍru se na svȅ fȏze pomȍć kȁda dȏjde po lȉti sȗša i po zȋmi vȇlika zȋma – a ja brȋžan, ča ću ja kȁd je blȃgo lȁčno, žȇdno i bȏno? Ča meritȁju vȁjka prȇmju dobȉt unȋ ki su bugȁti i ki ȉmaju svȅga? Ne znȁju õni da smȍ ja i mõja Bȃrbara trpȉli vȅć pūtȋ glȃd i žȇju sȁmo da nȁn Boškarȋna ne krepȃ! Ne znȁju õni kolȉko smȍ se mi za nju mȕčili kȁd smȍ iskȁli za nju sȇno, trvu i vȍdu. Mi smȍ se tnjili i mršvȉli, sȁmo da se ȏna udebȅli – a ȏni, šjȏr Mȏmolo, ča su ȏni učinȉli za svõju Rȍšu? Ma, jȕšto nȉš! Gojȉli smȍ mi seljȃki to blȃgo ča su ga õni dopeljȁli z furȅšte zemljȇ… Ni krȁve na svȋtu kakȍva je mȏja Boškarȋna, pȁk grȇ prȇmja mȅni, a ne njȉn. Dȅlajte po pravȋci; dȃjte mi prȇmju ȅli almȅno mi tornȃjte nȁzda krȁvu. Na vȁn bẽče nȁzda – ča će mi ta limȏzina!

Tȃko je govōrȉja kumpȃr Zvȃne z sȑcen na dlȃnu i krvȃvih ubrȁzi.

Gospȏda su se sȁmo štȕpila. Prȇsjednik je ȉska da hlȁpci ud Mȏmole hȉte barufȃnta vȁn; podeštȁt je komȃndija nȅka zȏvu stražȃre aš da je seljȃk pijȁn ȅli mȗnjen.

• Mȏj dȏbri kumpȃr Zvȃne, svȁ su uvȃ gospȏda vȉdila segȕtra vȁšu Boškarȋnu. To ni vȉše krȁva, to je debȍto krepalȋna! – rȅka je šjȏr Mȏmolo.

Ma, na te besȉde seljȃk kȁko da se je pomūtȉja. Njigȍva krȁva krepalȋna? Ta ga ufȇža pȇče; ne mȍre on to pribolȉt. Ma, ȅli su gospȏda jȕšto dõbro vȉdila njigȍvu krȁvu? Nȅka hlȁpac dopȅlja sȁda z štȁle ud šjȏra Mȏmole Rȍšu i Boškarȋnu, nȅka he gospȏda nȁpro dȏbro poglȅdaju, nȅka njȉn pokȕse mlĩko, pȁk nȅka onipȗt sȗde ka je ud njȉh vȉše zameritȁla prȇmju.

• Ti čovȉk je mȗnjen – rȅka je prȇsjednik. Ȁla, poškercȃjmo se š njȉn prȉja nȅg dȏjdu stražȃri. Dȃjte vȁmo krȁve!

Šjȏr Mȏmolu ni sȉla ta žȅlja šjȏra prȇsjednika, ma su gȍsti takȁli pljȅskat z rukȁmi, i gospodȃr je morȃ namȉgnut hlȁpcan.

Štȁle su bȋle zȃjno uzȃda hȉže. Ni rabȉlo čȕda, i dopeljȁli su obadvȋ krȁve sprȋd gospȏde.

• O, blȃgo mõje! Boškarȋna mõja zlȃtna! – zvikȃ je seljȃk, skočȉja do krȁve i takȃ njȍj bukȉvat ȍči i čẽlo.

Gospȏda su prȁsla u smȋh.

I zasprȃvlje, zȕz čȉstu i lȋpo zgojȅnu šjȏr Mȏmolovu Rȍšu, Boškarȋna ud seljȃka se je zaparȉvala jȍš gȑžlja, mršavȉja i starȉja nego ča je jȕšto i bȋla.

• Pobrõji njȍj, kmȅt, z pȑston rȅbra! Sȉgurno njȍj fȁli kakȍvo.

• Ča si puštȉja da njȍj brẽki udgrȋzu rȇp?

• Škomȅtimo se da će hlȁpci ud šjȏra Mȏmola raspīlȉt grȇdu na njojȅmu hrbȁtu!

Gospȏda su se svȅ jȁče rūgȁla z Boškarȋnon, a z kmȅtovih očȋ su rondulȁle sȕze.

• Ćȅte vȉdit – vȋče Zvȃne, pȁk se kalȉva na kolȉna i lovȋ z rukȁmi krȁvu za vȉme.

• Nemȏj je brȋžnu!

Seljȃk ni vȉše slȕša ča mu se rȗga gospȏda; klečȋ spȍd krȁve, nȉšto njȍj šaputȃ, glȁdi njȍj z dlȁni vȉme, pȁk je lovi za cȉce i počȉnje mȕst.

Boškarȋna stojȋ prȅz se maknȕt; glȅda u mȋru i plȁho u gospȏdu. Njȏje se je vȉme spȍd dlȁni ud Zvanȇ zaokruglȉlo i nȁdulo. Cȉce u ručetȉnah ud kmȅta su nabrȅkle; i dvȃ mlȁza mlȋka su zletȉla ž njȉh.

• Bȏg mȏj! Nȉšto je stȅšo kȁplo.

• I to je svȅ, kmȅt! Ne mȕči je vȉše.

Ma, mlȁzi mlȋka šȉbaju z vȉmena svȅ žȉvlje i jȁče. Mlȋko kȍpa stazȉce u zẽmlji, pȉni se i šūmȋ; udskočȉlo je ud grȍte i zašpricȁlo je lȋce šjȏr prȇsjedniku ki se je bȉja sprȉga za bȍlje vȉdit ti mirȃkulo.

• Pũšti, zmȕza si je! – je rȅka šjȏr Mȏmolo.

Kmȅt je ulovȉja drȕge dvȋ cȉce. Procīdȉlo je i ž njȉh, ma su mlȁzi jȍš naglȉji i dȅblji. Mlȋko grȇ u pljȗsku, pȉni se, šūmȋ spȍd mȑšave krȁve ka se je zaglȅdala u gospȏdu. Zẽmlja ne pȋje vȉše mlȋko, i seljȃk klčȋ u lokvȉci.

• Dȃj, Boškarȋna, dȃj! – vȋče Zvȃne, pȁk se je dȉga i tȕcka krȁvu po bȅdri.

Z četȉri cȉce grȇ mlȋko, tẽče sȃmo i prȅz frmȁt u četȉri mlȁza, bȇlo kȁko snȋg, zadȃje po jȁgodicah. Kȁko da je pȕč udrȉja z četȉri gȑla, u četȉri žȉle, z grȍte ud gȏre, pȁk se belȋ, štrmorȋ i kantȃ kȁko će sȁda užīvȉt svȅ unȏ ča je sȗnce upȅklo, žȇja ubȉla. Tũče, tȍči se i cȋdi mlȋko ud Boškarȋne, i šūmȋ za slȁtko ud trafȍje, za udȏr ud kadȕlje na pȁši; za fȏrcu ud šuštȃnce ča je lȉtnje sȗnce zgušnjȉva u gȗstoj travi. Štrmȍri mlȋko ud Boškarȋne za pȏt ud težȃki, za fȏrcu ud njȉhovih mȕškul, za bistrȋnu njȉhove dȕše ka znȃ čȕda tȅga potrpȉt i podnȅst. Lȍkva se belȋ nasrȋd vȑtla, patȍkići križuljȁju ud nje prȍti kantūnȁn ud vrtlȋća, a mlȋko tẽče dȁlje i šūmȋ: „Ja sȁn bȇlo i z udȏron, ja sȁn tȅplo i za nahrnȉt! Pritȃčen se ud začȇtka z žȉle u žȉlu, z vȉmena u vȉme, ma svȅ gȕšće i slȁje, za nadojȉt vȁšu dičȉcu, a vȁs sforcȁt.“

• Kumpȃr Zvȃne, je škȍda za mlȋko!

Seljȃk mučȋ i glȅda. Njigȍvo se čẽlo vedrȋ glȅdajuć kȁko se ta gospȏda štȕpe. Ȕni patȍkići z lȍkve ud mlȋka su narȇsli i žvȇlto rȉvaju po vȑtlu za ga potopȉt. Razlȋva se mlȋko svȅ naȍkolo, dȉže se kmȅtu do spȏd kolȉna, a gospȏda su se napȑtila na kantrȋde za ȗjt ud tȅga potȍpa.

• Hlȁpci! Brȇnte i bȁčve!

• Kmȅt, ča su svȅ vȁše krȁve takȍve?

• Kolȉko bȉš za njȗ?

• Zaslȗži prȇmiju? – pȋta Zvȃne.

Gospȏda vȁde z žepȋ šȏlde i prstȇnje z rȗk, vȁde zlȃtne verȕge z prslȕka, pokȗpljaju sȑebrnu posȕdu po bȃnku, prikȉdaju z sȅbe nȃkit, pȁk svȅ to hȉtaju u kmȅtov klabȗk.

Seljȃk glȅda u zlȃto i srȅbro; pensȃ kȁko će jȍš danȁs zaštȕpit svõje sẽlo, kȁko će prihȉtit Bȃrbari ȍko vrȃta svȅ te verȕge, kȁko će uzīdȁt hižȉcu z štȁlon za drȕgu Boškarȋnu i kūpȉt sinokȍše i njȉvu, tornȁt dȗge, platȉt tȁše i postȁt gospodȃr.

Gȍdi kumpȃr Zvȃne i podsmihȉva se glȅdajuć u svȏj klabȗk; pȁk, kȁko da ga je strȃh da ga ta gospȏda ne kojenȁju i ne pokrȇdu, strȇsa se je, skočȉja prȉko plȍta. Zletȉja je u škȗro i zajȁha bȅštiju ča ga je čȅkala pȍd granȁmi ud lȉpe.

Zȃjno u sunčestȍku ustȁla je segȕtra Bȃrbara ud kumpȃra Zvanȇ i ubȁšla sẽlo. Pȋta za svojȅga mȗža. Nȃdjala mu se je sȉnoć; čȅkala ga je cȋlu nȏć; njȅga jȍš vȁjka ni. Ȅli ga je ki ud susȅdi vȉdija na samlju? Ȅli znȁju ča za Boškarȋnu?

Povȋda kmȅt Bȅpo da je vȉdija kumpȃra zjȕtra na samljȉšću, jȕšto ȏntar kȁd je na sȉlu stȉja da ga pȕšte z krȁvon sprȋd komišjȗn, i da je čȕja kȁko su ljȗdi ȍkolo Zvanȇ vīkȁli i švīkȁli. Kmȅt Jũre je povȉda da se je zvȅčeri nȁša z kumpȃron u oštarȉji; Zvȃne je pȉja, ma kȁko da mu ȕno vȋno sȉnoć ni jȕšto najbȍlje hodȉlo zdȏlu – bȉja je nȉšto slȁbe vȍlje.

Bȃrbara se je zapensȁla; potȅkla je dȍma, zȁprla vrȃta ud hȉže i pȍšla prȍti grȃdu. Stȉla je pȏjt do unȇ oštarȉje. Pasȁla je pozgorȋcu i rivȁla na čȅstu ča pȅlja prȉko brȋga. Ni korȃkla ni dvȁjset kȏrki po čȅsti, kȁd je debȍto je prȅnulo nȉšto čȓno u grȃnju ud štȑpeda.

Žẽna je dȍšla blȉže i poglȅdala.

Naprȃšen i rasprekȉdan, zgrebȅnega lȋca i rȗk, z nȍson u ȃriji i z rastȇgnjenima nogȁmi na čȅsti, lȅža je kumpȃr Zvȃne kȁko kalȍtina u plȍtu ud čȓnega tȓna. Spȃ je i hrkȃ na vȇliko, a na ȕsnicah mu je treputȃ smȋh, jȕšto kȁko da gȍdi prikazȃnju nȉkega posebȏjnega snȁ.

BESIDARNIK

(155 riječi)

almȅno – barem

ȃrija – zrak

bȇči – novac

bȅja – bijeli

Benȇci – Mlečani

blȃvo – plavo

blokȁn – blokiran

brȅk – pas

brȋg – brijeg

butegȃri – prodavači, trgovci

cȁte – šape

cimȉtar – groblje

čȅsta – cesta

činprȅs - čempres

črȉpnja – peka

debȍto – skoro

dimbȋna – dubina

drȉto – pravo, ravno

drȋvo – drvo

drugȃšlje – drugačije

facȏli – marame, rubci

fatepȍšte – namjerno

fȇrmo – zaustavljeno

fȅta – kriška

fȏrca – snaga

fȏza – način

frmȉvat – zaustavljati

gȏbast – pogrbljen

gvȃrdija – straža

hȉža – kuća

hlȁpci – sluge

iskȁt – tražiti

jȁgodice – jagode

jȍped – opet

kalȁt se – spustiti se

kalȉva se – spušta se

kalȍtina – cjepanica

kȃnta – pjesma

kapȁce nosȉt – mogu nositi

kapitȉva – događa

klabȗk – šešir

kojenȁt – prevariti

kolȇmbat – ljuljati

kolȉna – koljena

komišjȗn, komišijȗn – komisija, povjerenstvo

komȍštre - lanac o koji se vješa posuda u kojoj se kuha na ognjištu

kontrapȇza - ravnoteža

kȍrat – dvorište

krepalȋna - crkotina

kȍtule – haljine

krȕljast – šepav

kumpanȉja – društvo

kumpȃr – kum, oslovljavanje starije osobe

lȁčno - gladno

lȁhti – laktovi

lȁloke – čeljust

lȇlajuć se – ljuljajući se

litrȁt – slika

lȕgasto – sivo

mȁlin – mlin

medežȉja - lijek

meritȁju – zasluže

mȋh – mijeh

mȉsec – mjesec

mravȋnci – mravi

mravnjȃk - mravinjak

muntȁnje - planine

mȕškule – mišići

nabȅčit se – narogušiti se

nȃdjat se – nadati se

najtȑdlji – najtvrđi

nakmȉt – nahraniti stoku

napastȍvali – silovali

nȁpro – jako

neprȇtelj – neprijatelj

nȍhti – nokti

ȏntar – onda

Ȏrko - ili Mrak (tal. Orco, prema lat. Orcus: demon smrti, zagrobni svijet), u poganskom vjerovanju u Istri demon koji putnike navodi da se izgube; u nekim se krajevima nazivao i Bilfo

oštȃr – gostioničar

oštarȉja – gostionica

pacijȇnca – strpljenje

paljarȉca – vrsta kreveta (madrac od listova kukuruznih klipova)

pastȍl – cipele

patȍk – potok

pekljȁt – prositi

peljȁt – voziti

pokȕsit - probati

Porȇšćina – Poreština

posebȏjan – poseban

povȏdnja – poplava

pozȋmak – jesen

pozgorȋca - uzbrdica

prȁsci – svinje

prȇmja, prȇmija – nagrada

pričȉnj - prikaz

prȏnta – spremna

prȍti – protiv

pȕč – izvor

rančȋne – naušnice

razmontȁt – razmontirati

rȋlo – njuška

rȉnulo – gurnulo

sȁje – čađa

samȁnj – sajam

samljȉšće - sajam

sinokȍše – pašnjaci

sirȍšćina - siromaštvo

sprȉga se – sagnuo se

strȕna – rijeka

sunčestȍk – izlazak sunca

šašȋn – ubica

šiljȃr – šešir

šjȏr – gospodin

škarpȃda – kamenita provalija

škomȅtit se – kladiti se

škȏrnje – čizme

šȏldi – novac

štȅura – porez

štrȋge – vještice

štȕpit se – čuditi se

takȁle – zalijepile

tȁše – porezi

tȃti – lopovi

tȋri – udarci

tornȁt se – vratiti se

trafȍja – djetelina

trapulȇri – prevaranti

tȓda – tvrda

trȕpit – udariti

ublȇmbat se – opiti se

ubrnȕlo – okrenulo

ufȇža - uvreda

ugȃnat – pogoditi

ukodlȁk – vukodlak

uslobodȉt se – osloboditi se

vȅro – zaista

verȕge – lanci

vȉje - ulice

vȉtrenjak – vjetrenjača

vitrinȃr – veterinar

zalȇmbala se – zanjihala se

zapensȁla se – zamislila se

zasprȃvlje – zaista

zaštrigȁno – začarano

zaštȕpit se – začuditi se

zdõlu – dolje

zijȃt – glasno vikati, drečiti

znadstrȉh - nadstrešnica

zogȁju - igraju

zrȉvali – izgurali

zvirjȁt – viriti

zvȋzde - zvijezde

ždrljȋt – zuriti

želȉzo – željezo

Žȉdi – Židovi

ŽIVOTOPISI

DENIS KONTOŠIĆ

Rođen je 13.6.1959. god. u Puli. Po zanimanju profesor inženjer strojarstva (magistar edukacije), zaposlen u Istarskoj županiji kao viši savjetnik za ceste i cestovni promet (2004. do danas). U poduzeću Uljanik, Pula, radio 23 godine (1981.-2004.) kao projektant, menadžer za kvalitetu i rukovoditelj odjela održavanja. Predavač strojarske grupe predmeta, u više škola i učilišta, preko 30 godina (1985. do danas). Načelnik Općine Barban u 4 mandata (2001.-2017.). Član je Društva hrvatskih književnika od studenoga 2024. Ima status hrvatskog branitelja (ličko ratište, prva crta bojišnice – 1994.). Živi s obitelji u selu Orihi (Općina Barban).

Pjesme su mu objavljene u 4 samostalne zbirke pjesama: Suncu se ubrnut (1993.), Dih (2007.), Vorihi dih (2012.) i Sunčestok (2022.) te u više od 50 zajedničkih zbirki, zbornika i antologija: u 6 zbirki Literarnog kluba Uljanik, u zbirci antiratne poezije Via crucis Croatiae – Istarska molitva za Lipu našu (1992.), u 31 zbirci Verši na šterni (1994.-2024.), u zbirci orišanskih pjesnika Na Brišku (1999.), u antologiji modernog istarskog pjesništva I ča i što i kaj (1997.), pjesničkim panoramama Seljanski susreti: 1992.-2012. i Verši na šterni: 1994.-2013., u zbirkama pjesama na labinskoj cakavici: Merlići od ca (2015.) i Ćakuloda na Turjone (2016.), u 13 zbirki Beside u jatu (2012.-2024.) te raznim časopisima. U razdoblju 1988.-1998. pisac i govornik humorističko-satiričkog čakavskog lika barba Mate (Radio-Pula, Radio Istra, Glas Istre). Urednik je 10-tak zbirki čakavskih pjesama istarskih pjesnika, te urednik 14 zajedničkih zbirki susreta barbanskih čakavskih pjesnika Beside u jatu (2011.-2024.). Član uredničkoga odbora zbornika Barbanski zapisi, sv.1.–12., znanstvenog skupa u čast barbanskog kanonika i književnika Petra Stankovića, te autor desetak stručnih radova (tehničkih, povijesnih).

VLADIMIR NAZOR

Hrvatski književnik, pjesnik, prozaist i prevoditelj. Rodio se u Postirama na otoku Braču, 30.5.1876., a umro u Zagrebu, 19.6.1949. Studij botanike završio u Grazu 1902. Radio je kao srednjoškolski profesor u Zadru (1901–03), u istarskim mjestima (1903–18), u Zagrebu (1918–20) i kao upravitelj dječjega doma u Crikvenici (1920–31). Od 1931. živio je u Zagrebu, gdje je 1933. umirovljen, a gdje ga je zatekao i II. svjetski rat. Zajedno s I. G. Kovačićem prebjegao je 1942. na teritorij pod nadzorom partizanskih jedinica. Nakon rata postao je predsjednik Prezidija Sabora SR Hrvatske.

U godinama I. svjetskog rata, i kasnije, Nazorovo pjesništvo postaje duhovnije i subjektivnije (Intima, 1915; Niza od koralja, 1922; Pjesme o četiri arhanđela, 1927; Deseterci, 1930; Knjiga pjesama, 1942). Priključivši se 1942. partizanima, ušao je u novo životno, a donekle i književno razdoblje. Dio pjesama s kojima se vratio iz rata i onih nastalih nakon rata u duhu su njegova kasnoga međuratnoga pjesništva. Najvažnijim se u Nazorovu bogatom opusu smatra pjesništvo. Kao pjesnik afirmirao se zbirkama pripovjednih pjesama (Slavenske legende, 1900; Živana, 1902; Knjiga o kraljevima hrvatskijem, 1904; Hrvatski kraljevi, 1912), knjigama lirike (Lirika, 1910; Nove pjesme, 1913) i epovima (Medvjed Brundo, 1915; Utva zlatokrila, 1916). Godine 1904. počinje pisati i Istarske priče, a nekoliko godina kasnije, 1908., objavljuje pripovijetku Veli Jože – djelo po kojemu će biti prepoznati Nazorova proza. Njegov opsežan pripovjedački opus dodiruje se s pjesničkim, osobito u dijelu u kojem prevladavaju motivi iz mita, legende i folklora (Istarske priče, 1913; Stoimena, 1916; Arkun, 1920).

Prvi motivsko-tematski krug Nazorove novelistike je vezan za razdoblje od 1907. do 1910. godine kada objavljuje novele Veli Jože, Boškarina i Divičin grad koje će kasnije uvrstiti u Istarske priče. U prvo izdanje Istarskih priča nije uvrstio Velog Jožu ni Boškarinu, a Divičin grad uvrstit će tek u treće izdanje iz 1930., u knjizi Istarski bolovi. U tom krugu u prvi plan dolazi autorova socijalna angažiranost. Drugi krug je obilježen arkadijskim motivima, a obuhvaća novele Halugica, Albus kralj, Djevica Placida, Šuma bez slavuja. U tim novelama se uvelike dionizijski opjevava istarski pejzaž, ali i alegorijski progovara o svojim stremljenjima. Kasnije je objavljena novela Svjetionik iz 1918. godine kao i Bjelouška iz 1926. godine. Treći krug čine novele iz zbirke Stoimena iz 1916.

Nazor je jedan od najplodonosnijih pisaca u hrvatskoj književnosti, autor velikog opusa različitih žanrova: pjesama, epova, novela, romana, dnevničkih zapisa, putopisa, eseja, članaka, priča i igrokaza za djecu.