veli bepo IV - gamela.sikuti.hr

Vladimir Nazor

VȆLI BȄPO

(1908.)

Preveja štoriju VELI JOŽE na barbansko - orišansku čakavštinu i stavija naglaske na beside: Denis Kontošić, mag.educ.

IV.

Vȇliki je strȃh zagospodarȉja za Sȇnsovu po grādȋ i gopȍdskih istrijȃnskih kaštȅli.

Pȍkle Vȃzma, u rȃnu zȏru, mȏre je hȉtilo dȉva na krȁj u Rȁšken kanãlu. Ta je hȕdoba sȉgurno razbȉla i potopȉla po nõći nȉku mlečȁnsku gȃliju aš su vȃli ȕno jȕtro donȅsli na grȍte na krȁj i rasprekȉdane ȃrbule i vȅsla. Pastȋri su ga vȉdili kȁko počȋva i se sȗnča na pećȉni. Su ga imȁli nȁvar prȉko klȃnca i z dalȅkega. Bi se bȋli zȁkleli da su mu vȉdili brȃdu ȍštru kȁko ud delfȋna, i rȇp ud rȉbe z kȉn je mlātȉja trãvu ȍkolo sȅbe.

To su povidȉvali pastȋri, a po sȅli zȕz kanȃ prisȉzali su ljȗdi da su vȉdili Vrȃga, visȍkega kȁko gȏra, svȅga rasprikȉdanega i mȍkrega kȁko grȇ po strȃni z vȇlikon pȁlicon i zmȉjon u rũki. Prikorȁčija je hȍdeć crikvȉcu zȕz čȅstu i pȃrtija dȁlje u bȕru. Ma nȉsu sȁmo takȍvi glȃsi tȉrali grajȁne i barȕne u strȃh i rȃbiju. Dȋvu ni bȋlo dȍsta ča je strȃh ulovȉja gospȍdu, kȁko da je i on nikȋ, nȅgo bi stȉja jȕšto i škȍdu njȉn načinȉt. To strašȉlo ud mȏra u figȗri ud čovȉka se je stȁlo na Jurȉća, mlȃdega dȋva, ki je vȅć dvȉsto lȋt u slȕžbi ud gospȏde u Kršȁnu, pȁk ga je nagovōrȉlo ȅli sforcȁlo nȅka hȉti plȗg ud gospodãra u strȕnu i nȅka pȏjde š njȉn. Jurȉć ga je popȅlja h dȋvu ki ȍre njȉve i čȗva blȃgo plomȋnskoj gospȏdi, pȁk pȍd grȃd Kȍžljak, Belȁj i Lupoglȁv, u Porȇč, Pȁzin i Buzȅt. I u svȁken je mȉstu hlȁpac – dȋv napuštȉja svojȅga gospodȃra.

U mȁlo dȃn, zȉbra je ti tujȋnac ȍkolo sȅbe dvajsētȁk takȍvih kȁko ča je i on, pȁk he je popȅlja u gȏre mrȅž Pȁzina i Motovȗna.

Svȁke fȏze glȃsi je hodȉlo ȍkolo. Dȋvi su pȍšli u bȍške; prontȉvaju se za napȁst. Ud dȇbli cȅra dȅlaju oni pȁlice, z kȉma će se kalȁt u grȃde i levȁt krvȃvo kȍlo. Zȁkleli su se da će se hrānȉt sȁmo z mȇson ud ljȗdi, pȉt sȁmo kȓv i grȉjat se na vȍgnju ud nȁžgetih grȃdi. Šȕškalo se je da he je svȁki dȃn svȅ vȉše i da se je štrigȗn ud mȏra ukrunȉja za krãlja ud dȋvi. Zȁdnje i najhȕje, ča se je povidȉvalo, je da su dȋvi pȍčeli zīdȁt grȃd na vȓh gȏre, za ku se je kušeljȁlo da su na njȏj vȅć uzdȃvna stȃli Brekoglȃvci, gȓde bȅštije, pȏ ljȗdi - pȏ brȇki, ki su lovȉli dȉcu po sȅli, pȁk he pȅkli i proždȉrali. Vȉdili su dȋve kȁko pȅljaju kamȇnje i dȇbla po pozgorȋci. Svȁka grȍta kȁko vȏ, svȁka grȇda kȁko kȗla. A nikȋ je rȅka da je grȃd vȅć uzȋdan – nȁpro vȇlik i strahovȉt. Upasȃ ga je zȋd i brȃni ga kȗla z ke nahrupȉvaju dȉm i vȍganj kȁko z vulkȃna, a plȁč i vrȉsak čȕju se na dalȅko.

Tãko se kušeljȁlo po Ȉstriji; i svȉ grȃdi su zȁprli svõja vrȃta, a svȉ kaštȅli ud gospȏde su dȉgli mȍste i stȁvili gvȃrdije.

Prȅz hlȁpci - dȋvi pȗste su sȁda krȁse, razdibljȁle su se brȃjde i njȉve debȍto po cȋloj Ȉstriji. Pȑvi ki su se zbūdȉli, su bȋli grȍfi i barȗni. Blȃva je kȓv škičȁla u njȉhovih žȉlah. Oni da strahȕju ud tȉh hlȁpci? Oni da ȉmaju strȃha ud tȉh pȅkljari? Trȉba he nȃjt i z bičȍn u rũki potȉrat na dȅlo i nȁzda u jārȁm. A zaškrgutȁli su i grajȁni, ma njȉn ni zašūmȁla kȓv, nȅgo njȉn je zakrūlȉja štȕmig. Kadȉ nȁn je zȇlje, žȋrje i mȇso? Cekȋn za gȍt mlĩka! Dukȁt za glavȉcu kȁpuza! Svȅ ćȅmo njȉn ubećȁt, sȁmo nȅka se tornȁju!

Gospȏda su zȁšla z svojȉh kȗl, podeštȁti i vȇlike glȃve z svojȉh grādi i stȁli su se za razvȉdit kȁko se skoporȉt z tȅga jȃda i sramȏte.

Gospȏda su pensȁla da se dȋvi morȁju zatȗć i zaklȁt. Sȁmo ko se kakȍv hlȁpac sȃm prȅda, zaslūžȉt će za dȁlje žīvȉt i za slūžȉt nȁprid gospodȃru. Motovȗnski kamarlȇngo Čivȅta pensȃ je drugačȉje. Prȅz hlȁpci se ne mȍre žīvȉt. U Motovȗnu su, vȑžmo rȅć, grajȁni zalȗdo provȁli u rȗke ulovȉt matȉke, sikȉre i čobȁnsku pȁlicu; mȕškuli su njȉn za takȍvo dȅlo prevȅć dȅbuli, dlȁni prevȅć mȅki. Hlȁpci su kȁko gnjȏj, ki smrdȋ i šporkȉva, ma je stȅšo potrȉban. Morȃmo njin čūvȁt živȍt i potēgnȕt he jȍped h sȅbi. Jedȋno ti strahovȉti dȋv, ki se je stȁvija na čȇlo ud būnȇ, zaslȗži smȑt. Ma – aš Motovȗnci ne žbaljȉvaju u šušpȅtu da to ni nȋdan drȕgo nȅg njȉhov Vȇli Bȅpo – kamarlȇngo bi stȉja na lȋpo tornȁt u kȍmun motovȗnski tȅga žbaracȋna. Nȅka se, dȍnke, pošȁlje nȁše ziberȅne za kušeljȁt z dȋvi. Čivȅta se šperȃ da će žveltȅca i furbȅca premȍć grȇžu sȉlu i štupidȅcu.

Pȍkle čȕda besȋd ke su natȅzale na svȅ bȃnde, premȍgla je besȉda gospȏde ki bi se tȗkli. Deštinȁli su da će vȋtez Ȏdo i barȗn Bračodȕro zagalopȁt do grȃda ud dȋvi. Z dalȅkega će he kumpanjȁt čȅte gospȏde i grajȁni z orȗžljen svȁke fȏze.

Na dalȅko i širȍko se je čȕlo za ȉme vȋteza Ȏda Vaksenštȁjna, gospodȃra ud Kȍžljaka, tȁmo zȕz Ćȅpićko jezȅro. Ȏdo je nikȁda sȉka glave ud Saracȇni u Svȇtoj zȇmlji i gonȉja Mȃure po Špȃniji. Dȅset lȋt se je zȇmlja štȕpila unȅn ča je dȅla. A kȁd se spȍd njigȍvega bȃta zrȕšila i zȁdnja kȗla ud neprȇteli, kȁd je klȍnuja u kȓvi i prȃhu zȁdnji nespovȉdani soldȁt, tornȃ se je unipȗt ti hajdȗk u svȏj Kȍžljak za počȉnut i prontȁt se za nȏve bȏrbe. Da mu se sȑce ne bi zmekljȁlo i da mu mȕškule ne klȍnu prȅz dȅla, krīpȉja je rȗke i nȍge na svojȉh hlȁpci, dȍkle su ti strahljȋvci škičȁli i tūžȉli se na vȋteza, aš nȉsu rivȁli kapȉt kȃko je plemenȉto trpȉt nȉšto ud svojȅga gospodȃra kȁd je to svȅ u korȉst ud svȉh. – Mlȃdi je barȗn Bračodȕro, gospodȃr ud kaštȅla Pietrapelȍze, bȉja stȅšo poznȁti kavaljȇr. Bȉja je poznȁt kȁko najbravȉji konjanȋk, mȅštar ud kȏplja i mȁča. Tornȉva se je vȁjka dȍma z vencȍn na glȃvi. Nȉšto je stȅšo fȁlilo u tȏj slȁvi; ni jȍš imȃ pȍd rukȏn za ubȉt čovȉka. Barȗn je zavrisnuja ud vesȇlja kȁd je dȍzna da će pȏjt z Ȏdon u junȃčku bȏrbu.

Takȍvi su bȋli ta dvȃ rabijȁna zmȁja, pȁk su grajȁni i gospȏda bȋli sȉgurni da će potȗć te rȃzbojnike.

Cȋlo pramalȋće hodȉle su u Pȁzin čȅte za se pokȕpit, uškvarȁt se za bȏrbu i za pȁrtit prȍti zidȉnah na vȓhu Brekoglȃvlje gȏre.

Jȕr ud zdȃvnega vrȉmena štȕpili su se Istrijȁni vȇliken brȋgu u sȑcu svõje zemljȇ. Vȓh mu je bȉja širȍk, rȃvan kȁko dlȃn i debȍto cȋli gȍja, aš sȁmo dvȁjset cȅri štrčȋ na bȃndi ud bȕre te krȁse. Upasȁn je z zȋdon ud kamȇnja na kȅn se ne vȉde sinjȃli ud bȃta zidȃrskega. Te su letȉce sȁmo slȍžene jȇna na drȕgu. Na njȉh žȋvo rȇste mȃh, zelenȋ se pȁprat, rȇste kakȍv štrpedȉć. Nārȍd govȏri da je to svȅ ustȁlo ud zrȕšenega grȃda ča su ga vȅć uzdȃvna bȋli uzidȁli Brekoglȃvci, ki su krȅli po sȅli blȃgo i dȉcu, pȁk kȁmo srȉće da he vȉše nȋ! Ko se skȍpa škȕlja kadȉ ćȅš na vȓhu, vȁjka ćȅš nȃjt kȍsti svȉh fȏz i kȍsti glȃv, a nȃjt ćȅš i nȉke sikȉre ud grȍte, balȍte, ȉgle i svȅga drȕgega! Bȉlo ča bȉlo, to je grȃd Brekoglȃvci i to mȉsto je prȍkljeto.

I jȕšto na tu Brekoglȃvlju gȍru pȍšla je Bȅpina čȅta. Dȋvi su nȉšto znȁli za te štȏrije. Õni su se tu zmȉstili, ne želȇć poslȕšat Bȅpu za dȉgnut rȗke na svõje gospodȃre ki su he peštȁli.

I hlȁpci su takȁli čȉstit skȃse, orȁt dolȉne.

Ud zȏre do mrȃka rȏmpale su matȉke po ledȉnah. Učȉšćeno se pomȁlo privȑglo u njȉve i vȑtle. U zẽmlji je klijȁlo sȉme i pupȁle su mladȉce; trãva je rȇsla sȍčna i rȍsna; govȅdi je bȋlo sve vȉše. Težãki su se sȃmi štȕpili tȏj blagoslȍvljenoj zẽmlji ka njȉn je bugȁto plāćȁla za njȉhov trȗd. Kȁko da su vȋle sȉjale prȉko nȍći sȉme u brãzde, aš bi vȅć za kakȍv dȃn probȉle na njȉvi klȉce, pȁk su orãči govōrȉli: „Ki nȁn to sprȋd zȏru rastȅže zelȇne punjȁve na pȍlja i njȉve?“ – Veselȉli su se dȋvi; jedȋno je Bȅpo čamȑdija čẽlo kȁko da mu stȅšo ni prȁvo. Po cȋle dȃne je kȍpa u dolȉni kȁko nȋdan drȕgi. Zẽmlja je škrīpȁla, škȕcala i jōkȁla spȏd tȋri ud njigȍve matȉke, spȏd fȏrce ud njigȍvega vȑgnja. Gȍja do pȃsa, krvȃv ud trȗda, naprȃšen i blȁtan, pārȃ je i rȉza zȅmlju na prīpȅki ud sȗnca, na silovȉten vȉtru i dãždu, ma kȁd bi se u vȅčer tornȉva na brȋg, zavīkȃ bi: „To je sve dõbro i lȋpo, ma galijȍt Ȋlija je stȉja nȉšto drȕgo ud nȁs.“

Dȃni su pasȉvali, žȉto je rȇslo, žȋrje je zdrijȁlo po vȑtli. Umīrȉja se je i Bȅpo. Začārȁla je i njȅga zẽmlja ȍkolo Brekoglȃvlje gȍre, zarȇsla ga i usvojȉla. Žīvȉja je sȁmo za nju, pȁk bi sȁmo katrkȁd u njigȍven sȑcu nȁžgala se mȓžnja prȍti nikadȃnjih gospodãri; plȁnula bi, ma i ugāsȉla se kȁko ȉskra spȏd mȑzlega pȍpela.

Zagrȉjalo je lȉto i intrȃda se ukāzȁla. Zazelenȉlo se je zȇlje po dolȉnah. Borȋći i hrastȋći rodȉli su gȗste grȃne. Dȋvi su dȅlali mȋrno i prȅz škȓbi.

Mȕčili su se kȁko nȉkada do sȁda, ma he je to dȅlo pȕnilo z kuntentȅcon, srȉćon, ku su ćūtȉli pȑvi pȗt u svojȅn življȇnju. A kȁd su vȉdili da je sve zelȅno i zlȃtno ȍkolo brȋga, takȁli su regulȉvat zidȉne ud svojȅga grȃda i dȉgli su na glãvi ud brȋga drȉvene barȁke za blȃgo i sȅbe. Drivȅni grȃd, upasȁn z zȋdon ud kamȇnja i ukrȕnjen z vencȍn ud cȅri, zdȉga se je na vȓhu. Spodobȃ je z dalȅkega, u sunčestȍku, na konjanȋka ki glȅda z visȍkega ȍkolo sȅbe. Kȁd su dȋvi zabādȁli kȏlce u zȅmlju, nȁšli su čȕda škelȅti, ke su pȍbrli za he zakopȁt na krȁsi u srȋd grȃda.

Kȍpa je Jurȉć dvȃ dȃna jȁmu, kȁda mu je najedanpȗt zarȏmpala lopȁta i nȉšto je zalȁslo u škȗren. Hlȁpac se je sprȉgnuja, zaronȉja z rukȁmi u nȉšto lȕštro.

• Ča je? – pītȃ je Bȅpo, ki je potȅza škelȅte h jȁmi.

• Dȑž'! – jȃvi se Jurȉć i dȉgne pȕnu gȓst ničȇga. Bȅpo je ulovȉja.

• Ča je to? – pȋta Jurȉć kȕkajuć z jȁme.

• Šȏldi! Zlȃto!

• To je tȓdo, ne jȋde se.

• Ne znȃn ni ja za ča bi to bȋlo; ma su Motovȗnci kȁko mȗnjeni za tȏn prčkarȉjon. A je jȍš ča dȍli?

Jurić pȕšti lopȁtu, sprȉgne se, pȁk se zdȉgne držȇć u rukȁh dvȃ lõnca, z kȉh je sprȃza šȏlde, prstȇnja i kolȁne.

• Vȉš! – rȅka je Bȅpo. – To je nȉšto drȕgo. Zove se prstȇnje. Takȍve kolombȃre nȍse Motovȗnci na prstȋ, a to drȕgo nȍse žȅne na ušȋ.

• A zȁšto?

• E, tȃko! To je sinjȃ da ne smȋdu dȅlat.

• Ću nȁprid kopȁt?

• A zȁšto ne bȉš? Hȉti svȅ vȃnka dȍkle skȍpaš jȁmu. Nȁn to ne rȃbi.

Jurȉć je dȁlje kȍpa hȉtajuć u vȋs pȕne lopȁte šȏldi, prstȇnja, kolȃn i rančȋni, srȅbrnih čȃš i kȃleži. Bȅpo je skūpljȃ po ravnȋci škelȅte, dȉza pȇzu na živȍt i nosȉja he na rȗb jȁme za he dȍli složȉt u kȍpu.

Bȅpo zagȁzi u zlȃto, sprȉgne se zgȏr jȁme.

• Ȇla, Jurȉć! Dȍsti. Ćȅmo počȇt!

Jurȉć je skočȉja z jȁme.

Dȋvi su takȁli hȉtat škelȅte u škȕlju.

• Znȃš, Jurȉć, ti se štȕpin. I ti si š njȉma, - najedanpȗt je zrȅka Bȅpo.

• Nȅg da sȁn, kȁd ȉmaju prȁvo. Ča ni tãko svȅ kãko rȃbi? Gospodȃri nȁs pȗšćaju na mȋru, a i mi njȉh.

• A da najedanpȗt dȏjdu?

• E, unipȗt bȉmo njȉn rȅkli nȅka grȇdu ča, da nȇćemo. Ča bi nȁn?

• A, tãko! Ma je galijȍt drugȃšlje povīdȃ; nȅka nȁn õni dȃdu nȁzda unȏ ča je nȁše!

• I ti, pȁk, zȃjno z tȉn svojȉn Ȋlijon. On ni znȃ ča nȁn trȉba. Mi smȍ takȍvi. Ubȉt, nažgȁt, potȉrat. Ma za ča, kȁd nȁn je tãko dȏbro: prȅz napȁst i prȅz grȋha. I svȅ ti je zalȗdo ča govȏriš. Smȍ te stȁvili za pȑvega, a ti si nȁn ubȅća da nȁs nȇćeš peljȁt na tȕje.

• Ma, ko ȏni navȃle?

• E, unipȗt - ne znȃn!

Škelȅti su vȅć ležȁli svȉ u jȁmi; škȕlja je bĩla debȍto pȕna. Za je poravnȁt, rȉnuli su u nju z nogȁmi ȕne šȏlde i prstȇnje. Zlȃto i svȅ to drȕgo luštrȁlo se je na sȗncu i bȍlo dȋve u ȍči. Jurȉć je zagrnȕja svȅ to z nikolȉko lopȃt zemljȇ; za poravnȁt jȍš bravȉje jȁmu, zapeštȃ je po zẽmlji svojȉma tȅškima nogȁmi i rȅka:

• Tãko nȁn je dõbro, nȉš nȁn ne fȁli.

Dȋvi su ulovȉli matȉke i pȍčeli se kalȉvat u dolȉnu kadȉ su njȉn kumpȁnji dȅlali, kȁd se se najedanpȗt frmȁli znenȃjeni i zaštȕpljeni. Zdõlu po brȋgu, ki je stršȃ na sunčezāhȍdu Brekoglȃvlje gȍre i zvȃ se Štrȋgina glavȉca, skalȉvala se je čȅta konjanȋki, a za njȉma rȇd unȉh ča su hodȉli na nȍge; lenprhȁju bandȋre, trumbetȁju trȗbe, rȏmpa orȗžlje. Jȅno dvȉsto kȏrki sprȉd soldȃti galopȁju dvȃ vȉteza u lȕštrih ȏklopi, z pȇrjen na šljȅmi, lamarȋnon na lȋven lȁhtu i z kȏpljen u desnȉci.

• Ki su ti? – pitȃ je Jurȉć.

• Ča ne vȉdiš. Õni – nȁši gospodȃri! Ča nȉsan ja prȁvo govōrȉja, a?

• Pȁk, ča ćȅmo? Ča će sȁda bȉt?

Bȅpo je zagrādȉja ȗsta z rukȁmi, zdȉga vrȃt i zagrmȉja:

• Ej, ljȗdi! Tȇčite gȍri! Tȇčite vrȇda!

Dȋvi u dolȉni su vȅć prȉja vȉdili soldȃte i sȁda su sprȁvljali ordȇnje za pȃrtit na Brekoglȃvlju gȍru.

• Bȋlo bi bȍlje da smȍ poslȕšali nȁšega pȑvega, Bȅpu – rȅka je jedȁn ud njȉh. – Ȅko, grȇdu nȁs sūdȉt, pȁk ćȅmo he morȁt na sȉlu stȗć.

• Mȕč'! – ujāvȉja se je pȁzinski hlȁpac Liberȁt. – Ča će nȁn õni! Nȁs je dvȁjset, pȁk ćȅmo he lȁko potȉrat. Hȍmo gȍri, pȁk ćȅmo vȉdit.

• Ne! – rȅka je ȕni pȑvi. – Speštȁt će nȁn dõlce. Za ča bi nȁn dȅlali škȍdu? Potȉrajmo he zȃjno.

Dȋvi nȉsu znȁli ko bi pȍšli soldȃte inkontrȁt, kȁd je naletȉja z visȍkega Bȅpin ȁviz.

• Poslȕšajmo nȁšega glavȃra! – rȅka je Liberȁt.

Ni pasȁlo čȕda i dȋvi su sidȉli ȍkoli Bȅpe na zidȉnah Brekoglȃvljega grȃda. Bȅpo njȉn je jȍped priporūčȉja nȅka potũču te soldȃte i tornȁju tãko za galijȍta Ȋliju. Ma su starȉji hlȁpci bȋli prȍti tȅga. Dogovōrȉli su se da ne prolȋvaju kȓv, ma da ne pȕšte nȁnke u fȁlu grajȁne prȉko zidȋn. Kad he nȁpro rabijȁju, unipȗt će he potȉrat. Tȅr, ča bi te mȃle žȁbice prȍti dvajsētȁk ljȗdi? Svȅ je lȁglje, kȁda õni vȉše nȋmaju strȃha ud njȉh kȁko prȉja. Glȇj, grajȁni su se vȅć frmȁli, rȅklo bi se da njȉn se ne grȇ prȉko dolȉne.

I zasprȃvlje; čȅte su se frmȁle na dnȕ gȏre. Glȅdale su intrȃdu u dolȉni, vȑtle po skȃsi i ȕne dȋve gȍri na zidȉnah. Počīvȁle su ud pũta i dobīvȁle kurȁj slȕšajuć kȁko vȋču vȋtezi Ȏdo i barȗn Bračodȕro, ki su i dalje galopȁli prȉko dolȉne. Jȁhali su kȁko strȋle. Pasȁli su u hȋp dolȉnu i rȉnuli zgõru na brȋg.

• Glȅdaju nȁs, a ne mȑdaju se! – rȅka je Bračodȕro.

• Dȗše ud hlapci! Ȉmaju strȃha! – udgovōrȉja je Ȏdo.

• Op! Op! – ubȍja je barȗn kõnja, pȕn žȅlje za se proslȁvit, kȁda bȕde pȑvi zabȍja svõje kȏplje u trbušȉnu kakȍvega dȋva.

I vȋtezi su kapitȁli sprȋda Brekoglȃvljih zidȋn.

Bračodȕro je potȇga rȅdine i pūhȃ u rȏg.

• Ča bȉte stȉja, šjȏr? – pītȃ je Bȅpo.

• Dõjdite se borȉt! – rȅka je vȋtez, prȍpeja kõnja i zamāhȃ z kȏpljen.

Ma, dȋvi kȁko da he nȉsu razumȉli.

• Strahljȋvci! Blȃgo! – vīkȃ je Ȏdo. – Zãjdite i dvȃ na jenȅga.

Dȋvi sȁmo sidȇ na zidȉnah i glȅdaju.

• Nȁprid – vȋču vȋtezi, pȁk namȋšćaju kȏplje i tȉraju kõnja.

Bȅpo je rivȃ kapȉt zlȍ i dȉga je vrȇda nȍgu ka mu je vȉsila na zidȉnah. Ma, mȁnje žvȅlat Jurȉć se ni mȁka, pȁk mu je Ȏdo z kȏpljen ȕša u mȇso.

• Vrȃg te ȕza! – zvīkȃ je Jurȉć.

Mlȃdi dȋv je zgūlȉja kȏplje z mȇsa, skočȉja dȍli z zȋda, korȃka šȅpajuć prȍti vȋtezu i udrȉja je z nogȏn Ȏdovega kõnja u trbȕh. Kobȉla je poletȉla u zrȃk i trȅsla z gospodārȍn u trãvu.

Dȋvi su prȁsli u smȋh. Ma, Bračodȕru je zakȕhala rȃbija i rȉnuja je prȍti Jurȉća. Dȋv ga je prikorȁčija i dȋga se na zidȉne. To je razvigurȁlo mlȃde dȋve. Sȁda su hlȁpci držȁli nȍge zdõlu zȕz zidȉne; glȅdali su kȁko se vȋtez Ȏdo koporȋ spȏd kobȉle i igrȁli se ki će žveltȉje z plemenȉtin Bračodȕron. On njȉh u šklȋčke, a oni nȍge u ȃriju. I ta bi se vigurȉja rastȇgla u lȃrgo, da Bȅpo najedanpȗt ni zamȃha kȉlavo z nogȏn i trȕpija barȗna jȕšto u pȑsa. Bračodȕro je zletȉja u vȋs, pȃ je u štȑped, z kẽga se je do mȁla dȉga, ma z razbijȅnin orȗžljen, rastrešȅnih kȍsti. Ȏdo se je nikȃko skoporȉja spȏd kõnja; ulovȉja je trũbu i zatrūbȉja trȋ pȗt.

Na ti sinjȃ levȁla se je svȁ soldatȉja u dolȉni.

Zȕz štȓmȍr i škȉč, udrȉle su čȅte prȉko dolȉne i rȉnule po pozgorȋci. Je he kȁko mravȋnci, pȑte se kȁko vȃli zȕz letȉce. Pokrȉle su cȋlu bȃndu brȋga i vȅć se rȉvaju prȍti zȋdu. Orȗžlje rȏmpa, kȏplja letȇ i švȋču strȅlice.

• Nȁprid! – zagrmȉja je Ȏdo. - Nikȋ su rȁnjeni. Ne prolȋvaju nȁn kȓv.

• Trȕpaju sȁmo z nogȁmi. Nȁprid! – škičȋ Bračodȕro, kȇmu se dȗša vȅć tornȉva u zdȑmane kȍsti.

• Vȇli Bȅpo! Vȇli Bȅpo! – vȋču Motovȗnci.

I grajȁni, uhrȃbreni, mȋšaju se ȍkolo zidȋn, pȑte se zȕz grȍte z nožȅn u zubȋ.

Dȋvi su se mȁlo pogubȉli, na znȁju ča bi. Rȉvaju grajȁne z rukȁmi i z nogȁmi, strȁše he z besȉdami. To dȁje kurȁja unȉn ča napȁdaju, pȑte se i pȍ nogȁh ud dȋvi, kȗnu kȁko vȇri gospodȃri svõje trȕbaste hlȁpce.

• Bȅpo, – jȃvi se Jurȉć, kȇga je pȅkla rȁna na nȏgi, - ča ćȅmo he?

• E, - udgovōrȉja je Bȅpo, - ja bȉn!

• Ne! – vȋče hlȁpac Liberȁt.

• Čȁ ćȅmo unipȗt? – pȋtaju dȋvi svojȅga pȑvega.

Bȅpo je hipȁc propensȃ, pȁk je pokāzȃ z rukȏn cȅre uzȃda drivȅne barȁke.

• Pomẽtite he!

Nikolȉko dȋvi je poletȉlo prȍti dȗban. Tornȁli su se z zgūljenȉma cȅri, ubrnȕli su korȇnje u vȋs, zagȁzili u kȕp grajȁni.

• Ho! Ho! – zvȋkli su hlȁpci, pȁk rašīrȉli nȍge i takȁli mȅst: ki zȋd, ki pozdolȋcu.

Najedanpȗt je svȅ bȋlo u štȓmȍru, jōkȁlo se, zvȃlo pȍmoć i bižȁlo. Grajȁni su letȉli u zrȃk, pȁdali u trãvu, vāljȁli se po skȃsu, tūlȉli i zgūdȁli zmȕčeni, rastrešȅni i pȕni prȃha, dȍkle su mȅtle ud dȋvi mȅle prȅz mȉlosti i jȃko he rȉvajuć po pozdolȋci, gȍneć he po tȓnju kamenȉtega brȋga.

Grajȁni su dȉgli lȏgor na Štrȋginoj glavȉci. Rȅkli su da trȉba kaštigȁt te rȃzbojnike, popeljȁt jȍped u zāgȍn te zdibljȁne ȏvce.

Kamarlȇngo Čivȅta se je veselȉja tȅn ča vȋtezi nȉsu nȉš načinȉli, kušeljȁjuć ča bi rābȉlo poslȁt do hlȁpci.

Čȕda su se dogovārȁli, pȁk su se juštȁli da će podeštȃti ud Motovȗna, Pȁzina i Lȁbina pȏjt z kamarlȇngon u grȃd ud dȋvi i da će bȋlo kãko natentȁt hlȁpce da se tornȁju.

• Sramȏta! – štȕpili su se barũni. – Juštȉvat se z hlȁpci!

Ma, podeštȃti su se napȑtili na tovȁriće i povarisȁli u dolȉnu pȍgnuto i tȉho, prȅz nȋnega nȁprid za rȅć da grẽdu i prȅz kumpanȉje. Svȁki je ud njȉh stȉja, držȇć se šȇrijo i zgõru, skrȉt strȃh ki njȉn je peštȃ dũšu. Sȁmo je Čivȅta škīljȉja pȍredno z očȋ sȉguran da će prȉja ȅli pȍkle kojenȁt te dȋve.

Sȗnce je bȋlo visȍko na nȅbu kȁd su podeštȃti rivȁli zdȏla zidȋn.

• Ča bȉte stȉli? – pitȃ he je Jurȉć ki je ti dȃn čuvȃ strȃžu.

• Stȉli bȉmo kušeljȁt z vȁšima pȑvima.

• A, tãko! Počȅkajte unipȗt. Bȅpo! Liberȁt! Tȏme! O-o-o-j! – zȁzva je hlȁpac.

Podeštȃti nȉsu čȕda čȅkali. Na zĩdu su se pokāzȁli Vȇli Bȅpo i dvȃ drȕga sȗra dȋva.

• Õni su nȁši pȑvi, šjȏr podeštȁt! – rȅka je Bȅpo svojȅn nikadȁnjen gospodãru i sȉja na zȋd. Ča bȉte stȉli?

Motovȗnskega podeštȁta je tȁkov dȏček uhrabrȉja i pȍčeja je držȁt gȏvor, ki mu se vȅć dvȃ dȃna vrtȉja po glãvi. Rȅka je Bȅpi kȁko mu je drȃgo ča se je dȋv škapulȃ z Barbabiȃnkinega brȍda. Motovȗnci su ga dȕgo počekȉvali prontȉvajuć mu pečȅne võle i brȇnte vĩna, aš grajȁni vȁjka poštȋvaju Bȅpu. Zȁšto se, ȏntar, ne tornȉva pȍli gospodȃri? Za ča je ȕša u ti nākȍt ud Brekoglȃvci, u tu prȍkljetu gȏru?

• Nȁn je tu lȋpo! Dȅlamo! Ȉmamo slobȏdu.

Podeštȁt ni očekȉva da će z Bȅpovih ustȋ čȕt te besȉde, pȁk ni znȃ ča bi mu udgovōrȉja. Ma, se je umišȃ kamarlȇngo i zamolȉja Bȅpu nȅka mu pokȃže hȃrte u kȉh pȋše da je hlȁpac rȃvan z grajȁnon i da mȍre bȉt slobȍdan. Bȅpo se je mȁlo zmūtȉja. Kamerlȇngo ga je ȏntar pitȃ, eli znȃ on ča bi to bȋlo: imȁt slobȏdu.

• Ne znȃn, ma ȅko... Sȁd mi je nikȃko drugȃšlje. Sȁd mi je dȅlo milȉje. Sȁd je svȅ to mõje. Čovȉk sȁn ka i ȏni.

• Tãko je! Tãko! – jāvȉli su se unȋ drȕgi dvȃ dȋvi.

Čivȅta ni nȉš udgovōrȉja. Ti hȋp su mu se dȋvi zaparȁli jȍš vȅći nȅg ča su bȋli.

• Bȅpo! – pitȃ je podeštȁt. – Grȇš, dȍnke, z nȁs?

• Šjȏr, - udgovōrȉja je dȋv, - pȕšte vi nȁs! Kȁda bi hlȁpci stȉli mȅne slȕšat, dȍšli bȉmo mi do vȁs da nȁn tornȃte svȅ ča je pȍli vȁs, a nȁša je mȕka i trȗd.

Podeštȁt se je usnītȉja na te besȉde. Takȃ je ubećȉvat. Hlȁpac će imȁt svȇne pravȋce kȁko i grajȁn; kȍmun će ga hrānȉt.

• Znȃte, šjȏr, - rȅka je hlȁpac Tȏma – mi ne grȇmo vȉše pȍli vȁs. Zȃbite nas i dȅlajte si sȃmi na unih njȉvah.

Podeštȃti su se stȉsli i takȁli se prontȉvat za pȏjt ča. Ma je Bȅpo prikorāčȉja zȋd i stȃ sprȋd njȉh.

• Počȅkajte! Nȇću da grȇte prȃznih rȗk.

Rȗke ud dȋva su bȋle pȕne zlȃta i srȅbra.

• Dȉo šȃnto! – zvȋkli su podeštȃti.

• Kalȃjte šiljȃre! – rȅka je Bȅpo.

Zalȁsla je vȇlika srȉća na unȉh ubrȁzi; ȍči su zasvitlȉle.

Z Bȅpovih ručetȋn je pȁdalo prstȇnje, kolȁne i dukȁti u šiljȃre ud gospȏde. Podeštȃti su rȉvali jedȁn drȕgega, dȉzali su se na pȑste; rastȇgnjenega vrãta, zdȉgnute glavȇ, dȍprtih ustȋ i zbȅčenih očȋ tȋskali su vȁjk na gȍri šiljãre prȍti rȗk z kȉh je pȁda zlȃtni dȁž.

• A mȅni nȉš! – je rȅka kamarlȇngo.

• Tȅbi ne dȃn! Si pȍredan čovȉk, - rȅka je dȋv i skočȉja na zidȉne.

Zidȉne su jȍped bȋle pȗste, sȁmo se vȉdila Jurȉćeva glavetȉna ubȓnjena prȍti Štrȋginoj glavȉci.

Podeštȃti su zajȁhali tovȁre, pȁk zletȉli po strȃni zdȏlu.

*** tornaj na prvega ***

*** tornaj na drugega ***

*** tornaj na tretega ***

*** se nastavlja ***

Manje poznate beside:

Sȇnsova - kršćanski blagdan Kristova Uzašašća (Spasovo, Spasovdan). Slavi se četrdesetog dana nakon Uskrsa i zato je uvijek u četvrtak.

Vazȁm - Uskrs

strȕna – rijeka