Vladimir Nazor
VȆLI BȄPO
(1908.)
Preveja štoriju VELI JOŽE na barbansko - orišansku čakavštinu i stavija naglaske na beside: Denis Kontošić, mag.educ.
VII.
Hlȁpac je užīvȃ ča je gospodȃr ud kȗsa zemljȇ. Nȉšto nȏvo se je būdȉlo u težku – bȉt gospodȃr, mȍć rȅć: „To je mõja njȉva! Mõja bȍška!“ On će dȉgnut strȉhu na svojȏj grȕdi, napȕnit je z blȃgon i šenȉcon, žīvȉt sȃm i lȉber. Hlȁpci su ulovȉli matȉke u rȗke i poletȉli na štȑpede i ledȉne za provȁt zȅmlju. Ma ni durȁlo čȕda, i nikȋ su rȅkli: Zapȁla mi je slȁba zẽmlja; susȅdova je čȕda bȍlja!“ Drȕgi su se potūžȉli: „Ni najhȕje, ma je mȏj pȁrat najmȁnji i susȅd pasȉva prȋko mojȅga.“ Do nikolȉko dȃn su svȉ govrȉli da su he drȕgi kojenȁli. Zȁšto nȉsu razdīlȉli dolȁc na dvȁjset kȗsi da svȁken nȉšto dȏjde: Tȅr, onȏ je – zẽmlja! Zȁšto Bȅpi, Liberȁtu i Mȃrki unȏ ča valjȃ, a njȉn plȋtka i ȑžinava zẽmlja? Sȁda je hȕje nȅg prȉja. Do sȁda su imȁli svȉ jednȁko, pȁk se nȋdan ni žȁlija.
Jurȉć je skȑšija sprȉd svȉh matȉku i hȉtija je u tȓnje.
• Darȕjen vȁn svȏj kȗs! Ča će mi grȍte? Rȁje nȉš.
• Ni poštȇnja na svȋtu! – rȅka je Tȏma, ki je govrȉja da su ga pokrȅli kȁd su mȉrili zȅmlju i ȉska je da mu mȁknu kunfȋne.
• A ča je to prȁvo da drȕgi grȇdu prȉko mojȅga! – vikȃ je trȇti.
I nȏva barȕfa se je tko nȁžgala mrȅž hlȁpci.
Šturmȁli su se za blȃgo ko je u nȃglo nestȁlo. Čivȅta njȉn je rȅka nȅka si zibȅru nȏvega glavȃra, aš da on se tornȉva u Motovȗn. I sȁda su svȉ stȉli ulovȉt se te čȃsti: stȃrci su kāzȁli svõje sȗre lȃse, mlȁji svõje mȕškule. Dȋvi su jȍped pasȉvali dȃne u kȃrbi, i življȇnje njȉn je hodȉlo svȅ tȅže.
Liberȁt i Mȃrko se jȍš nȉsu usūdȉli pȏjt u dolȁc za dȅlat svõju kampȁnju. Imȁli su strȃha ud Bȅpe. Branenčȁn je porūčȉja hlȁpcan da se on ni zȁkleja na lȉbru z krīžȍn ud srȅbra i da on ne želȋ znȁt za unȗ njȉhovu dilȉdbu. Dolȁc je vȁjka bȉja njigȍv, pȁk nȅka se nȋdan ne usȗdi taknȕt njigȍvu zȅmlju. Čivȅta je rȅka da se on u tu kȃrbu ne želȋ uplȉtat: nȅka svȁki ud njȉh brȃni svõju pravȋcu kko znȃ i mȍre.
Pȍkle jȅno desetȁk dȃn, kalȃ se je stȃri hlȁpac Mȃrko u dolȉnu i takȃ se je škūljȁt ȍkolo svõje kampȁnje.
• Ča dȅlaš tȏte? – zvȉka je Bȅpo tēčȗć prȍti hlȁpcu.
• Ȍči su za glȅdat!
• Ča ȉšćeš na mojȅn?
• Na tvojȅmu ne ȉšćen niš. Grȇn na mõju zȅmlju.
• Kadȉ je tvõja zẽmlja? Grȇš ča!
• Ja sȁn totȅka gospodȃr!
I hlȁpac Mȃrko prikorȁči plȏt.
• Grȇš, elȉ ne? – rȕka je Bȅpo, pȁk vȉdeć da ga Mȃrko nȁnke ne glȅda, zaletȉja se je na hlȁpca.
Gonȉli su se bȋsno; tȗkli su se prȅz mȉlosti. Dvȃ pȗta je Bȅpo hȉtija dȍli Mȃrku i napeštȉva mu lȋce z pȕnjami. Stȁrac – hlȁpac, vȉdeć da bi mȍga zgȉnut, skoporȉja se je z Bȅpovih rȗk i takȃ je bižȁt. Branenčȁn ga je tȉra svȅ do pozgorȋce, prȇteć mu da će ga drȕgi pȗt ubȉt ka i brẽka.
Kȁd se je Mȃrko pokāzȃ u grȃdu, unȃko zgrebȅn i stučȅn, svȉ hlȁpci su takȁli vīkȁt prȍti rȃzbojnika. Ne puštȉt gospodȃre na njȉhovo, udrȉt stȃrca! To je svȅ pofȁt tȅga ča ga nȉsu kaštigȁli kȁd njȉn je nȁžga grȃd. Čivȅta je mȕdar i prȃvičan, ma je premȅk. Ni na čȃst kȁd te gospodȃr šȉba, ma da te hlȁpac tũče, to je vȇlika škifȅca i sramȏta. Liberȁt je molȉja i kūmȉja kumpȁnje da se kalȁju u dolȉnu svȉ skȕpa pȁk da navȃle na barufȃnta; nȅka ga ulȍve i vȇžu. Ko bȕdu svȉ slȍžni, lȁko će ga ukrotȉt; aš ko ne nȇće vȉše nȋdan smȉt se kalȁt u dolȉnu, a pȁk to bi bȋla prevȇlika sramȏta za svȅ težke. Ma, stȅšo su svȉ hlȁpci bȋli nanevȉdni na Mȃrku i Liberȁta ča su dȍbili kȗs zemljȇ u dolȉni, pȁk su se u sȑcu radovȁli svȅn tȅn i nȃdjali se da će Bȅpo jȍš jȁče bīsnȉt.
• Nȉste ljȗdi! – sdȉja se Liberȁt.
• Ča ȉmamo ud tȅga ča smȍ skȕpa? Ma, pȁk jȕšto nȉš! – govrȉja je hlȁpac Mȃrko.
• Znȃš ča? - rȅka je hlȁpac Tȏmo Liberȁtu. – Dȃj ti mȅni tu zȅmlju u dolȉni, a ũzmi unȗ mõju blȋzu bȍške.
• To bȉte vi stȉli, ma ja nȉsan mȗnjen. Ja nȋman strȃha ud Bȅpe. Ćȅte vȉdit – udgovrȉja je Liberȁt. – Ma, ko me ča kapitȃ, ćȅte bȉt vi krȋvi i sprȋd ljȗdi i sprȋd Bȍga.
• Ȉmaš strȃha? – narūgȁli su mu se hlȁpci.
Ti svȇni dȃn zȁgna je Liberȁt svojȅga zȁdnjega võla pȍli kamarlȇnga. Hlȁpac je takȃ molȉt Čivȅtu nȅka mu pomȍre i stȁvi Bȅpi pȁmet u glavu. Kamarlȇngo je počāstȉja hlȁpca, ma mu je rȅka da on ni vȉše njȉhov pȑvi, aš da je bȍlan i da se prontȉva za pȏjt ča.
• Regulȃjte svȅ to sȃmi! Tȅr, niste dȉca.
• Smȍ hȕji nȅgo dȉca. Ko grȇte ča, ćȅmo se poklȁt mrȅž sȍbon.
Čivȅta se ni puštȉja. Ni stȉja nȁnke slȕšat nȉš za Bȅpu ni za dīlȉt kamapȁnju.
• Glȅdajte! – rȅka je Liberȁt – Sȁn ȕzeja matȉku. Bȉn pȍša kuntȇnto dȍli u dolȉnu dȅlat... Ma, ȕna sȍtona! Nȇće bȉt dobrȅga!
• Pȁk, hȍte! Tȅr nȉste stȁr i slȁb kȁko Mȃrko. Bȅpo će se ud Vȁs čūvȁt.
• Hȍte Vi s mȅnon!
• Se ne pačȃn! Čȗjte, Liberȁt: ȅko Vȁn kuntrȁt i pokȃžite ga Bȅpi. Dȑž'te i svȇti lȉbar, pȁk se Branenčȁn nȇće usūdȉt pȏjt prȍti Vȁs. Nȇće pȏjt prȍti svȇtega.
• Ȉmate prȁvo. Grȇn zȃjno! – zvȉka je hlȁpac, bȕkija krȋž ud srȅbra i stȁvija lȉbar za pȃs.
Liberȁt je ȕzeja matȉku i pȃrtija u dolȁc.
Bȉja je vȅdar zȋmski dȃn, sȁmo je tȁnka paučȋna ud maglȇ ležȁla jȍš na dolȉni. Krȍz nju su se vȉdili vȅći dȗbi i svitlavȋna patȍka ki je klokotȃ. Vȅć čȕda vrȉmena čȕje hlȁpac kȁko ga zõve võda u srȋd lȉtnjega dȃna kȁd sȗnce pẽče, a žȇja pȃli gȑlo, i kȁko võda čȕda pomȍre kȁda gorȇ žũlji na rukȁh. Povȋda mu ȕni klokȍt za zȅmlju pȕnu sȍka, za brȃzde i za korȇnje ča cikȃ vȍdu. Kantȃ mȃli patȍk hlȁpcu kȁnat za intrȃdu i za kampȁnju pȕnu žȋrja, kadȉ će zadāvȁt i uzdrijȁt žȋrje. – Ja, jȕšto u tȏj dolȉni procvitȁt će na zẽmlji najoholȉji cvȋt ud nje i zalȁsnut će na sȗncu najlȉplji njȏji dȃri! Na njȏj ni tȓnja ni kamȇnja, rȃvna je ka i dlȃn, natȍpljena z patȍkon i ukitȁna z plȍti zimolȇza i lȉšnjaka. Trãva ka se zelenȋ na njȏj i u srȋd zȋme, i drȋvo vȁjka nakitȁno i bugȁto, govȏri težãku da je ȏna fȍši zȁdnji kantunȉć zagubljȅnega rȃja na zẽmlji. „To je prȃva zẽmlja!“ – zrȅka je hlȁpac, pȁk bȕkija lȉbar i zakorȁčija žȉvlje. Kȁd je Liberȁt dȍša u dolȉnu, maglȇ vȉše ni bȋlo; mȍkro drȋvo i grȍte svitlȉli su na sȗncu kȁko da su z rosȍn poškrȍpljeni.
• Kȁko rȃj je!
U dȏlcu ni bȋlo nȋnega, sȁmo su tȉći z čȓnima krȅli i bȇlin rȇpon skakutȁli zȕz patȍk. Sȗnčeva se je svȉtlost rashitȉvala po kotlȋni. Po stranȁh ud brȋgi klātȉli su ćȕfi maglȇ. Gȍri, na zidȉnah ud Brekoglȃvljega grȃda, sȗnčala su se trȋ dȋva.
Liberȁt je svȉ blažȅn glȅda svõju zȅmlju. Ȕzeja je matȉku, raširȉja nȍge i zamȁha. Črnȉca je bȋla mȃsna, gȗsta i zdrȁva – vȇri bubrȉg zemljȇ. Ȅla, kȁko će je on kuntȇnto kopȁt i orȁt! Kȁko će z vesȇljen sȉjat na njȏj! A õna će mu proklijȁt u pramalȋće! Po lȉti će on spȁt u dõlcu, u šušȗru ud klȃsi, zȕz klokotȃnje vodȇ i šȕškanje ud jȃblani ča se rȉvaju za gȍri zȕz patȍk kȁko stražȃri ud njigȍve zemljȇ.
• Liberȁt! – čȕja je nagrȉšpani glȃs.
• E! – prȅnuja se je hlȁpac z svojȅga snȁ.
Bȅpo je stȃ sprȉd Liberȁta z krvȃvima očȋ i blȋd u lȋcu; na njigȍven mȑšaven lȋcu vȉdilo se da ne spȋ čȕda i da je nȁpro srdȉt.
• Bȅpo, - rȅka je Liberȁt, - bȕdi čovȉk. Pũšti me da u mȋru dȅlan. Smȍ ljȗdi, ȅli smȍ dȉca?
• Liberȁt! Si čovȉk ti... e, si! Sȁn te vȁjka štimȃ. Si bȉja nȁš glavȃr. Ma, ča ne grȇ, ne grȇ!
• Ja znȃn ča dȅlan. Vȉ'š, ȉman hȃrtu! – pokāzȃ je Liberȁt kuntrȁt i ȕpra z pȑston u pečȁt.
• Ča će mi hȃrta!
• A ȉman i svȇti lȉbar. Vȉ'š krȋž na njẽmu.
• Ča krȋž? Ča lȉbar? Grȇš ča? Ma, zȃjno! – rasȓdȉja se je Bȅpo i rȉnuja Liberȁtu lȉbar u rȗke.
Liberȁt se ni mȁka, kȁko da su mu se nȍge zakopȁle u grȕde.
• Hȍj s vrȃgon! Hȕdoba! – strȇsa se je Liberȁt i ȍči su mu se nȁžgale.
Bȅpo se je zaletȉja na njȅga. Ulovȉli su se u krȉk. Borȉli su se čȕda, srdȉti i nȁžgeti. Tȗkli su se i grȉzli ka i brẽki, dȍkle Liberȁt ni zrȉva ud sȅbe Bȅpu, ki je udrȉja z līcȅn u zȅmlju.
• Si udebulȉja! – narūgȃ mu se je Liberȁt. – Sȁd hȍj ča!
Bȅpo se je dȉga i klȅka. Z nȍsa i ustȋ mu je tȅkla kȓv; dȋblji mu je vȍganj gorȉja u očȋ. Stȃ je hipȁc umȃmljen z krvȃvin mlȃzon na brȃdi i vrȃtu, a z razrogȁčenima očȋ, z nakostȑšenima lȃsi. Čȕja je bȕru u prsȋ, šūmȁlo mu je u ušȋ, a sprȋd njigȍvih očȋ Liberȁtov je litrȁt dȑhta kȁko vištȕra kakȍve zvȋri u mȃgli sprȉd vȅčer. I Bȅpi se je zaparȁlo u tȅn hȋpu da slȕša u tȅn šušȗru glȃs ud medvȉda, ud kȇga je kȁko dȋte brānȉja jedanpȗt, zȕz stȃrega ȍca, frȉšku rȁku ud svojȅga dȉda. Čȕje tȅžak dȋh ud ȍca, trȕpat sikȉru ud krȅmena i svõje ditȋnjsko sȑce, u kȅn je ljubȁv za speštȁnu rȁku jȁča ud strȃha sprȉd bȅštije. Krȍz nosnȉce udȉše udȏr ud kȑvi, smrȃd mȑtega tȋla i vȍnj kȍže ud zvȋri. Ćūtȉja je da mu svȁka žȉlica drhtȋ. Z dnõla sȑca, z dimbȋne ud njigȍvega življȇnja probȋja jȕr zdȃvna zabljȅna, prejȃka fȏrca ča ga tȉra nȁprid. Nȉšto ga nȍsi, kȁko vȉtar slȁmu, prȍti svȉh i svȁkega, a za unȗ grȕdu ča je dȍprta zavonjȁla sprȋd njȅga spȏda tȋra ud tȕje matȉke.
• Ja ne dȃn zȅmlju. Nȉkada!
I Bȅpo dȉgne ȍči h nȅbu, sprȉgne se i bȕki zȅmlju. Skočȉja je, zgrȁbija matȉku, zamȃha i kalȃ je z svȍn fȏrcon na Liberȁtovu glȃvu.
Hlȁpac je zajōkȃ, zalȅla se i zrȕšija.
*
Ubȋstvo hlȁpca Liberȁta je hȉtilo vȁn škvȁre i prȅnulo težãke na Brekoglȃvljoj gȏri. Nȉsu se usūdȉli tīcȁt mrtvȁca. Lȅža je dvȃ dȃna u dõlcu, a lȉbar z križȍn se je kūpȃ u njigȍvoj kȓvi. Strȃh i čȓna ćȗtnja mȕčili su težãke, ki nȉsu znȁli ča bi rābȉlo načinȉt. Pozvȁli su kamarlȇngu, a Čivȅta je potȅka Brekoglȃvljoj gȏri za pobrȁt plȏd ud svojȅga čȇkanja. Mlȇčanu je pȍšlo za rukȏn jȍš vȉše smūtȉt i zapeštȁt ȕne ljȗde. Uvelȋča je to ča se zgodȁlo, gonȉja je u njȉh virovȃnje u štrigarȉje, strȁšija he je z paklȍn, z sȍtonon, govōrija njȉn je za potrȉbu pokȍre, aš je Liberȁtova kȓv pȁla na svȅ dȋve. Zȁšto nȉsu frmȁli to šašȋnstvo? Zȁšto nȉsu pomȍgli svojȅn kumpȁnju kȁd he je molȉja? Bȅpo ni vȅći grȋšnik nȅg ča su svȉ õni. A unȋ je svȇti lȉbar ušporkȁn z njȉhovon kȃrbon, utopȉja se u kȓvi. Kuntrȁt je zapečatȁn šašȋnstvon; svȁ zẽmlja ȍkolo bȓda je grȋšna i prȍkljeta. Õna će njȉn rodȉt z tȓnjen i drȁčon. Morȁju pȏjt drugȃmor aš će ȍko Brekoglȃvlje gȏre klātȉt Liberȁtov hlȃd za he būdȉt z snȁ. Nȅka nȃjdu drȕgu gȏru, ma nȇće ni na njȏj ȗjt ud kaštȋga aš kȓv pravȋce vȋče do nȅba.
Hlȁpci su slȕšali kamarlȇngu, svȉ prȅnjeni.
Čivȅta njȉn je rȅka da zakȍpaju mrtvȁca i jāvija njȉn je da će jȕtri u zȏru ȗjt z tȅga krȁja.
Sprȉd vȅčer su se trȋ dȋva kalȁla u dolȁc. Svītȉle su pȑve zvȋzde kȁd su dȋvi zakopȁli svojȅga kumpȁnja. Pȍšli su zgȏru po bȑdu strahȕjuć na svȁken kȏrku. Kumpanjȁlo he je šȕškanje u štȑpedi i šušȗr žȗtih cȅri.
Tu nȏć su dȋvi bȋli zbȗjeni na zidȉnah. Nȇmir he ni puštȉja sklopȉt ȍči, a mȕčila he je i glȃd aš su zustȁli prȅz nȁnke jȇne ovcȇ u štȁli. Bȋla je mrzla nȏć. Zvȋzde su svītȉle z zakrvȃvljenin svȉtlon. Nikȇ ud njȉh su se razdvojȉle ud nȅba i pȁdale na dalȅke brȋge pȗščajuć za sȍbon sinjȃ ki je domīšljȃ težãke na škȉc ud kȑvi. Pūhȃ je vȉtar i zībȃ grȃne ud dȗbi ki su u škȗren spodobȁli na razbȋšnjene dȗhe ki mȃšu z rukȁmi. Daleko je nȋdi tūlȉja ȗk, krīčȃ ćȗk u bȍški blȋzu, a patȍk je klokotȃ u dȏlcu. Nȉkada šušȗr jȇne zȋmske nȍći ni tolȉko tȁka dȗše dȋvi.
Dȋve je ulovȉja strȃh. Kalȁli su se u dolȉnu.
Ma, nȁnke tu nȉsu nȁšli mȋr. Ȅli se je šȅgovi kamarlȇngo nȉšto spensȃ, ȅli je strȃh kojenȉva hlȁpce, ȅli se Liberȁt zasprȃvlje prihȉtija u ukodlȁka; njȉn se je cȋlu nȏć pričīnjȁlo da vȉde nȉšto bȇlo i visȍko kȁko klȃti u dolȉni, jȕšto ȍkolo ȕne grȕde na kȏj njȉn je kumpȁnj zgubȉja glȃvu.
U strȃhu i nemȋru dočȅkali su zȏru.
Kȁko da su se za to vȅć dogovōrȉli, pȍbrli su ordȇnje ud kampȁnje i pȃrtili svȉ skȕpa prȍti Štrȋginoj glavȉci.
Kamarlȇngo se je jȕšto bȉja dȉga za pȏjt pȍli Bȅpe, kȅga je jȍš vȁjka skriva u bȍku ud brȋga, kȁd su hlȁpci kapitȁli sprȉd barȁku.
• Ča je, ljȗdi? Stȅ me dȍšli pozdrȁvit.
• Ča grȇte, šjȏr?
• Ja, grȇn. Ča bȉn ja trȉba jȍš totȅka?
• Mi bȉmo stȉli mȁlo z Vȁs kušeljȁt.
• Pȁk, dȃjte!
• Vȅro, tȏte ne mȍremo vȉše zustȁt. Ni blȃgoslova, a nȋmamo ni ud čȇga žīvȉt.
• Nãjdite si nȏvi krȁj.
• To je svȅ lȁko rȅć, ma mi nȉsmo za to. Mi smȍ brȋžni hlȁpci, i sȃmi ne znȃmo nȉš dȅlat. A za žīvȉt ni dȍsta znȁt kopȁt. Mi ne znȃmo bȉt lȉberi.
• Pȁk, ča ćȅte unipȗt?
• Mi bȉmo se stȉli vrnȕt h nȁšin stȃrin gospodārȍn. Ćȅmo žīvȉt jȍped kȃko smȍ žīvȉli i prȉja. Ćȅmo dȅlat i slȕšat.
• Eh! – učinȉja se je šȇrijo Čivȅta. – To je svȅ dõbro, ma će li vȁs õni stȉt?
• Vi stȅ prȃvi čovȉk. Ćȅte nȁn pomȍć.
• Ću provȁt. Vȉdin da ste u nevȍlji. Čȅkajte me tȏte hipȁc.
I kamarlȇngo pȏjde u barȁku za se dogovōrȉt z svojȉma ljȗdi.
• Smȍ dȍbili! Pobȋdili smȍ! – je zvīkȃ, zȁjno ča je zȁpra vrȃta za sȍbon. – Dȋvi su se pripuštȉli; ȏvce se tornȉvaju u dvȏr.
Vesȇlje se je tornȁlo mrȅž grajȁne, a je bȋla i skrȃjnja ȗra aš su u grȃdi nȇmiri i nevȍlje rȇsli. Sȁd kȁd se hlȁpci tornȁju, svȅ će se rīšȉt.
Čivȅta je napīsȃ vȉše lȅter za podeštȃte i barȗne i je rȅka da svȁki grajȁn popȅlja z sȍbon po jenȅga hlȁpca i da ga prȅda gospodȃru. On će z Vȇlin Bȅpon u Motovȗn. Ni čȕda durȁlo i dȋvi su se pȍčeli pozdrāvljȁt za rȃstanak. Bȋli su mučȇčni. Stȃri hlȁpac Ȋve se je dȕgo borȉja, ma ni zdurȃ: sȕze su mu takȁle tȅć po ubrȁzu; zaplȁka je ka i dȋte.
• A, rȁne mõje! Brȋžni i tȗžni mõji! Ma, zȁšto je svȅ to tãko? Zȁšto ni sȁda kȁko ȕne pȑve dȃne? Bȅpo, zȁšto si unipȗt unãko govōrȉja?
I stȃri hlȁpac si je takȃ gūlȉt svõje sȗre lȃse.
Nȏvo patimȇnstvo peštȁlo je sȑce tȉh ljȗdi. Jȕšto kȁda su se dīlȉli – razdȋljeni z ȍmržnjon, zmȕčeni ud kȃrbe, strȃha i barȕfe – zaparȁlo njȉn se je ka i i nikȁda prȉja da su svȇne kȑvi i svȇnega kolȏra, da su patȋši svȇne mȕke. Čȕli su se ka i da he vežȉva nȉšto ča se ne mȍre prikȉnut.
• Ustȁnimo odȅka! – šȁpnuja je Jurȉć.
Dȋvi su sprȉgli glȃve. Ćūtȉli su u dnȏlu sȑca škȉfo prȍti gospodȃru i sramȏtu za svõje dȅlo. Zȁdnje ugljȇnje vȍgnja, ča ga je Vȇli Bȅpo staknȕja, a dȅlo u slȍštini razgorȉlo, jȍš kūjȋ nikȃdi u kantȗnu težȃčke dȗše – ma, ȉskra ne se razgȍri u ȍganj; zgȉnula je jȍped u dimbȋni njȉhovega čovȋštva. Hlȁpci su se poglȅdali jȍš jedanpȗt, pȁk su se levȁli za svojȉma kumpȁnji. Kalȁli su se u klānȁc, pasȁli ȍkolo Brekoglȃvlje gȏre; razdīlȉli su se na svȅ četȉri bȃnde istrijȃnske zemljȇ.
Na njȉhoven je brȋgu lȅža ȍblak maglȇ. Kȁko da se je gȏra, na kȏj su pasȁli najsrićnȉje svõje dȃne, zamotȁla u vȅlo da ne glȅda svõja nȏva patimȇnstva i ȕne jȃke muškardȋne pogȑbljenega živȍta i kalȁne glavȇ, ki grȇdu u nȏvu pȃtnju i pržȗn... Iz ȕne maglȇ čȕli su hlȁpci žȁlosno stȅnjat – glȃs ud kakȍve zvȋri ča se žȁli ȅli glȃs kakȍvega brȇka ki zabljȅn zavȋja. Patȍk je u dolȉni grmȉja dȋblji kȁnat za vȉtar ki će ga ud sȁda nȁprid ubahāžȁt, za kamȇnje ča će ga gūšȉt, za tȑnje i drȁču, z kȉma će se na vȓhi svitlȉt kȁplje neusvȇćene kȑvi.
*
Zȁdnji ki je napuštȉja ȕno mȉsto bȉja je kamarlȇngo. Za njȉn je hodȉja Vȇli Bȅpo. Kȁko da je dȋv ustȁra u mȁlo dȃn za stȍtinu lȋt. Korȃča je prikȉnjen i zgȑbljen. Nȉšto bȏno vrtȉlo mu se je ȍko ustȋ, sidȉlo mu na čẽlu, rȉvalo vȁn z očȋ.
U pȏdne drȕgi dȃn upȁzili su pȗtniki z gȏre, mrȅž Dragȍnje i Mȋrne, hȉže ud Motovȗna.
Kamarlȇngo je zavīkȃ ud vesȇlja, a Bȅpi kȁko da je lȅdena rũka stȉsla sȑce.
Jȁše Čivȅta sprȋd dȋva na tovȁriću. Vȉtar mu vȅć nȍsi glȃs ud motovȗnskih zvȍni. Grajȁni su he sȉgurno vȉdili z dalȅkega, pȁk se dȉžu za dočȅkat kamarlȇnga. Ča nȉsu mȍgle načinȉt grajȁnske čȅte, fȏrca i glȃs podeštȁta, učinȉja je on sȃm. I sȁd se, ȅko, tornȉva z hlȁpcen Bȅpon; pȅlja ga kȁko stučȅnega brẽka. Za vȋk vȋki morȃ bȉt Motovȗn zȃhvalan kamarlȇngi. Do mȁlo, ȅko, jȍped i žȉto i blȃgo u grȃdu. Motovȗn će nȁnovo bȉt u mȋru, sȉguran i sȉt. – Čivȅta je upȁzija pršišjȏn grajȁni. Zȁšli su vȁn z grȃda, grȇdu prȍti njȅmu z dȉgnjenima bandȋrami, z bȗbnji, trunbȅtami i vȋčuć. Kȁko će ga õni ud sȁda štimȁt! Stȁvit će ga za sȗca, senȃt ud Mlȇčani će ga stȁvit za istrijȃnskega grȍfa. Grajȁni će večerȁs vīkȁt „Brȁvo!“ i „Vȋva!“ pȍd njigȍvin brkūnȍn; dȕg će rȇd z bȃkljami hodȉt po grȃdu večerȁs njȅmu u čȃst.
Čivȅta je trȕpija tovȁra. „Bȅpo, sforcȃjmo se!“
Ma, Bȅpo je svȅ pomȁnje korȃča. Glȅda je njȉve na kȉh se je čȕda vrȉmena mȕčija kȁko brečȉna, a za ȕne porȅdne gospodȃre. Glȅda je u bȍšku u kȏj se je kȑšija spȏda bȋča ud šjȏra Zvānȇ; mȑske su mu zidȉne ud grȃda i brȍdi dalȅko tȁmo na gȑlu ud strȕne. Vȉdija je pršišjȏn grajȁni i domȉslija se je pȃtnje, ufȇže i sramȏte. Ča jȍped će bȉt đogȁtula u rũki ud tȉh čovičȗljki? Provȃ je slobȏdu; znȃ ča je bȉt svȏj; osvidȍčija se je da su grajȁnu hȕji ud njȅga, da nȋma ča ud njȉh strahovȁt. Zȁšto bi jȍped bȉja njȉhov šćȃvo? Ma, on je prolȉja kȓv, ufȇndija je svõje kumpȁnje, načinȉja smȗtnju, pȁk je bĩla barȕfa, škȍda i sramȏta. – Kȁd se je tȅga domȉslija, jȍped ga je ulovȉla tȗga; dȗša mu je klȍnula. Šȁpnuja je: „Grȋšnik sȁn“ pȁk je pȃrtija dȁlje za kamarlȇngon.
Dalȅko prȍti sȗncu pokāzȁlo se je Bȅpi mȏre. Dȍprto mȏre je bȉlo kȁko špȇgalj. Ja, to je mȏre po kȅn je plȏvija ȕni dȃn pramalȋća kȁd se borȉja z vȃli na grȍtah u škȗren, na dȃždu i vȉtru – gȍja i sȃm, ma jȃk i hrȃbar kȁko pradȉd mu Vukȁn, ki se je rivȃ ubrānȉt ud vȇlikega čȃpa bȃki nasrȋd motovȗnske bȍške. To je unȏ svȇno mȏre z kȉn se je on borȉja i zvlȃda ga, pȁk je fȍši pofȁt tȅga – pensȃ Bȅpo – jȕšto ud unȇ nȍći tãko krȍtko i mȋrno. Dȋv se je domȉslija rumȍra vodȇ u srȋd prolȉćne nȍći i svojȅga kȃnta u šušȕru ud vȃli i u hȗku ud vȉtra. Svȅga se je domȉslija i zaparȁlo mu se je da ga je nȉšto trȕpilo u lȋce; najedanpȗt je čȕja bȕru u kȓvi i nȅmir u prsȋ.
Vȇlika je gȃlija plȏvila po mȏru. Nȁnke mȃlega vitrȉća ni bȋlo zgȏr vodȇ. Stȍtine vȅsli rȉvalo je brȏd nȁprid. Krȍz ȍblake su se probȉli trȃki sȗnca na ȕni brȏd, i lȃđa je zasvītȉla na debȅlen mȏru kȁko vȇliki gȁleb ki se je kalȃ na vȍdu, ma mu krȅla klempesȁju jȍš vȁjka u ȃriji... Brȏd letȋ prȍti krȁju, svȅ je vȅći, i ča grȇ blȉže krȁju, svȅ je vȉše vȇli mirȃkulo. Jȉdra su mu zgromičȁna i rasprekȉdana. Konȍpi vȉse na ȃrbuli, svȉ popȕškani i gnjȋli. Na bȍke, na sprekȉdanu prȏvu i na skȑšenu kȓmu pȗstega brȍda ulovȉle su se trȃve ča vȉse fȉntor z vȅsli, pȁk lȋno i jȕšto kolȉko trȉba trȕpaju u vȍdu, rȉvajuć svȅ bȑže štrȃnbasti brȏd prȍti krȁju... Rȅklo bi se, nȉka čudovȉta rȗka dȉgla je z dimbȋne mȏra jȕr zdȃvna potopljȅn brȏd, pȁk dȗh ud brȍda grȅ sȁda prȍti krȁju. Bȅpo je vȉdija kȁko se svȁ ȕna vȅsla dȉžu u vȋs kȁko stȍtine rȗk. Dȋv se je prȅnuja i frmȃ se. – „Galijȍt Ȋlija!“ – zašȁpta je. I zaparȁlo mu se je da svȅ ȕne rȗke prȋte z pȑston prȍti gȍri u sȑce istrijȃnske zemljȇ, jȕšto ka i da mu zapovȋdaju: „Hȍj ča!“ Tȁmo je tvõje spasȇnje!“ i zaparȁlo mu se da mu galijȍt jȍped hȉta u lȋce ȉskre i vȍganj, da ga dȑma z rukȁmi i da mu vȋče na ȍba ȕha: „Ne bȕdi šćȃvo! Ti si čovȉk.“ Pričȋnja se Bȅpi da jȍped čȕje galijȍtov kȁnat z nȗtra ud brȍda. Dȋv se je strȇsa i ulovȉja nȉki nȇmir; čȕje tȗć sȑce si i pensȃ: Ko korȃknen nȁprid, zakȕhat će mȏre, zagrmȉt će mi: „Sramȏta!“ a svȅ ȕne rȗke će me trȕpat u ubrȁz... Ja! Ja grȇn nȁzda. Platȉt ću za svȏj grȋh. Dȅlat ću sȃm i čȅkat si brȁte. I õni će dȏjt, a ko ne zȃjno, ma mogȁri do stȍtinu, do miljȃr lȋt. Nȁzda! Nȁzda!
Kamarlȇngo je svȅ jȁče šȉba tovarȉća. Ȅko, sȁda će sprȋd njȅga naletȉt pršišjȏn z bȍške. Tambȗri tȗču, trunbȅte trunbetȁju, bandȋre vijorȁju, vȋče se nȁpro.
• Bȑže, Bȅpo! Ȅko, rivȁli su.
• Žȋvija kamarlȇngo! – zagrmȉja je nārȍd na krȁj bȍške.
Podeštȁt se je pokāzȃ mrȅž dvȋ bandȋre, kumpanjȁn z gospȏdon, šjȏri i pȍpi. Nārȍd je poletȉja prȍti Čivȅti. Najedanpȗt se je načinȉja konfužjȏn. Svȉ se rȉvaju prȍti unȅn ki je pobȋdija. Stȉli bi mu bukȉvat nȍge. Nikolȉko mlajũhi je dȉglo tovȁrića z kamarlȇngon, ki je sȁda jȁha zgȏr mȏra ud glȃv.
Ma, ni čȕda durȁlo.
Najedanpȗt su se grajȁni zaškūrȉli u ubrȁzu; zablīdȉli su zaštȕpljeni, požūtȉli ud bȋsa. Vȋka i švȋk zagljȕhli su Čivȅtu. Ȍči su laskītȁle, pȕnje su prītȉle.
• Hȉtite ga dȍli! Zavẽžite niškorȉsti! – škȉča je podeštȁt. – Svȉ su grajȁni dȍbili nȁzad svojȅga hlȁpca, a mi? A mi?
Kamarlȇngo, treputȁjuć jȍš vȁjka na tovȁru u ȃriji, ubrnȕja je glȃvu naȍkolo i pȅna sȁda rivȃ je kapȉt ča mu je pȍšlo kȃko ne rȃbi.
Vȇli Bȅpo se je zgubȉja u zȁdnji hȋp prȅz šȅnja.
Manje poznate beside:
bȃki – bikovi
bandȋre – zastave
barȕfa – svađa
bȍška – šuma
brẽki – psi
hlȁpac – sluga
kalȃ se – spustio se
lȉbar – knjiga
miljȃr – tisuću
mirȃkulo – čudo
najhȕje – najgore
nanevȉdni – zavidni
nȁnke - niti
ordȇnje – alat
pramalȋće – proljeće
pršišjȏn – procesija
pržȗn – zatvor
se ne pačȃn – ne miješam se
staknȕt – potpaliti
šašȋnstvo – ubistvo
šćȃvo – rob
šȅnj – znak
šturmȁli su se – brinuli su
ufȇže – uvrede
ȗk – vuk
žȇja – žeđ
žȋrje – voće