Vladimir Nazor
VȆLI BȄPO
(1908.)
Preveja štoriju VELI JOŽE na barbansko - orišansku čakavštinu i stavija naglaske na beside: Denis Kontošić, mag.educ.
VI.
Žȇtva je – vȅsela i bugȁta – ȍko Brekoglȃvlje gȏre. Blagoslȍvljeno je dȅlo ud hlȁpci - dȋvi. Cȋli dȃn nȍse i potȅžu grajȁni - dȅlavci žȉto na brȋg. Kolȉbe su pȕne: svȅ je napȕnjeno zȓnjen, štȁle su preȕske za blȃgo. Kȍpe se slȃžu jȇna za drȕgon u strãni. Štrȍpe drȋva dȉžu se ȍkolo grȃda kȁko kȗle i zvonȋki. Grȃd ud kmȅti - dȋvi spodobȃ, na vȓh unȅga brȋga, na brȏd ča se zdȉga zgȏr vȃla krgȁn svȉn i svȁčin dobrȉn. Zȕz sunčezāhȍd i pȑvi se trȃki maglȇ ud pozȋmka vȗču po stranȁh, rȅka bi čovȉk da se bȃrka zȋblje na zelenȉlu ud brȋgi. Na njȏj su dȋvi marinȇri, vȇliki šȁtori i drivȅne kȗle. Grȃd ud hlȁpci - dȋvi u vrȋme žȅtve je kȁko vȇliko sȑce ko dobȋva z stȍtin žȋl kȓv pȕnu šuštȃnce i teplȋne, za se prihȉtit u cȉcu z ke će, kȁko z pȕča, tȅć hrãna. Veselȇ se dȋvi. I grajȁnan je zatrēpȁlo sȑce. Pȑvi ud dȋvi, unȋ grȇži Bȅpo, dobrȇ je rukȇ kȁko i sȗnce na nȅbu. Ud kȁda se je tornȃ kamarlȇngo Čivȅta z Motovȗna z nikolȉko vȍzi vĩna, Bȅpo se je pomȁlo za svȉn gambijȃ i postȃ je čovȉk za kampijȏn. Pĩje kȁko nȉki grȍf; zdȉže se i činȋ se kȁko da je pranȕk nȉkega krãlja Dragȍnje, čigȍva čȁša i krȕna su dȃn - danȁs na oltȃri motovȗnske crȋkve. Grajȁne ne bolȋ glãva za to ča se ti rȃzbojnik zoholȉja i ča se je pȍčeja kārȁt z svojȉma kumpȁnji. Bȅpo se je debȍto zpreteljȉja z svojȉma nikadȁnjima gospodãri. Dȁje svȁkemu ča su zaslūžȉli i prosȉpa šȏlde na gȓsti. Vȋtezi i vȇlika gospȏda su pȍšli ča z Štrȋgine glavȉce. Su rȅkli da njȉn je spȏd čȃsti z hlȁpci se juštȉvat i ciganȁt ud njȉh limȏzinu, pȁk su udjȁhali h svojȉn kȗlan. Ma za njȉh je stȅšo lȁko: totȅka sȁda špijȁju po čȅstah špašiđȇre i butegãre. A ča bi grajȁni prȅz Vȇlega Bȅpe? Dȋv jȍš ne znȃ ča valjȃ zlȃto, pȁk njȉn ga hȉta kȁko sȉme tȉćan; onȋ će za mȁlo dȃn z pȕnima žēpȋ u grȃde. – A i vrȋme je za vȅć jedanpȗt pȃrtit. Zȋma je sprȉd vrātȋ, a i Bȅpo njȉn je rȅka da je jȕr vȉdit dnȍ ud jȁme kadȉ grȁbi zlȃto. Dȋv za to ne hȁje aš su mu štȁle i kasũni z žȉton vȅć pȕni. Grajȁni stȅšo govȏre: „Hȍmo dȍma! Kȁd špendȃmo, ćȅmo dȏjt jȍped pȍli Bȅpe!“ I nikȋ su podeštȃti vȅć pȍšli ča z Štrȋgine glavȉce. Su rȅkli da su rabijȁni na to kȁd glȅdaju kȁko njȉhovi grajȁni dȅlaju hlȁpci hlȁpcu. Grajȁni govȏre da gospȏda grȇdu u grȃde aš ćȗte da će vrȇda fȉnit ta žȇtva na Brekoglȃvljoj gȏri; dočȅkat će podeštȃti i gospȏda grajȁne u grȃdu, pȁk njȉn u ȉme štatȗta kontrolȁt žẽpe i zmāmȉt njȉn šȏlde. Sve to znȁju i dȅlavci i butegãri, sȁmo kamarlȇngu Čivȅtu ne mȍru nȉkako kapȉt. On ne pȋta ud dȋvi šȏlde. Njȉn se lȋže i he pȗti kȁd ne znȁju ča bi. Prȉd mȉsec dȃn je ubrnȕja Vȇlega Bȅpu h njȅmu u gȍste; nȁpija ga je, a stȅšo mu ni ȕzeja zlȃto ča ga je dȋv nosȋja u njȉdri. Drȕga su nȉka gospȏda bȅn uslobodȉla dȋva ud te pȇze.
Kamarlȇngo se je pȁk rivȃ umīšȁt u kȃrbe ča su se rodȉle mrȅž dȋvi. Govȏri se da njȉn je on jedanpȗt i sūdȉja pȁk he pomīrȉja. Čivȅta ne kȗne grajȁne ča dȅlaju kȁko težãki i zapȉre ȍba ȍka za ne vȉdit svakakȍva čudȇsa. Podeštȃti grȇdu ča; on ustȁje z svojȉma hlȁpci. Dȅla na Štrȋginoj glavȉci barȁku, - sigurno će ustȁt prȉko zīmȇ u tȉh brȋgi. Ča sȁnja ti Mlȇčić kȁda vȉdi hlȁpce u slobȏdi i jȃke, a dȋv Bȅpo prosȉplje zȁdnje dukȁte? Fȉnila je žȇtva za dȋve i trgȁdba zlȃta za grajȁne – je vrȋme za pȏjt ča. Kȁda se ukȃže pramalȋće, õni će jȍped dojt uvȁmo za vȉdit ko je Bȅpo naletȉja na kakȍvo nȏvo zlȃto.
Tãko kušeljȁju grajȁni i dȅlaju zȁdnja dȅla ȍkolo Brekoglȃvlje gȏre. Kalȉva se mãgla, pȗšu pȑvi mȑzli vȉtri. Grajȁni se dȉžu za pȏjt ča. Primȏrci su vȅć pȍšli. Svȁko jȕtro pȏjde ča kakȍva čȅta z Štrȋgine glavȉce. Lȏgor je debȍto prȃzan i zažūtȉja je ud lȋšća ko je pȁlo.
Zȁdnji ki je pȃrtija je bȉja motovȗnski podeštȁt.
• Grȇmo i mi! – je rȅka jedȁn dȃn kamarlȇngu.
• Ustȁjen! – udgovōrȉja je Čivȅta.
• A za ča?
• Ja ću nȁzad z Vȇlin Bȅpon.
• Škercȃte, kamarlȇngo! Zgubȉli smȍ za vȁjka hlȁpce.
• Nȉsmo ne!
• Ča ne vȉdite ča je!? Prȅnuli su se, složȉli su se. Mȕka njȉn je rodȉla. Õni nȁs vȉše ne trȉbaju.
• Trȉbaju! Stãza je do slobȏde dȕga i pȕna tȓnja.
• Õni su je vȅć pasȁli z svojȉma velikȉma nogȁmi. Õni su nȁs prikorȁčili. Grajȁni su slūžȉli svojȅn nikadȃnjen hlȁpcu.
• Grajȁni su slūžȉli zlȃtu. Plȁzili su sprȉd zlȃtnin telcȍn, nisu se klȁnjali tȅn dȋvu na nogȁh ud gnjȉle. Dõbro je ča su nȁši zmȕzli šȏlde z gȓsti ud hlȁpci, ma je hlȁpac nȁša kȃvu ku ne smȋmo puštȉt z nȁših rȗk. Onȏ ča dȋv morȃ prikorȁčit da bi dȍša do slobȏde ležȋ u njẽmu. Z tȉn računȃn.
• Vi se onipȗt nȃdijate da ćȅte u njẽmu zatȗć čovȉka?
• Ti je čovȉk jȍš vȁjka tãko mȃli da ga ne trȉba nȁnke tȗć. Dȍsta mi je katrkȁd potaknȕt unȏ ča će se prȅz drȕge zgodȁt.
I podeštȁt, kȁda je vȉdija da se Čivȅta ne da nagovōrȉt, pȁrtija je prȍti Motovȗnu. Jȁha je zamȉšljen pensȁjuć kãko će dȍčkat lȁčna lȉta ka su već strȁšila. Njigȍva je prȃtnja pȃrtila prȉko gȏre, a Čivȅta je dȕgo sidȉja sprȋd svõje barȁke z nikolȉko grajȁni, ki su se bȋli zaklȅli da ga nȇće puštȉt sȃmega mrȅž unȉma dibljãki.
*
Prȅz upȁzit, požūtȉlo je lȋšće ud jȁsena i līskȇ, zakrvāvȉle su grančȉce na švȋbu i drẽnu, a plȏd leprȉna je zalȁska po štȑpedi kȁko kȁpljice ud kȑvi.
Pomȁlo umȉre pozȋmak na pȍstelji ud lȋšća ko je pȁlo. Strnȉšće šȕška po njȉvah. Šūmȇ grȃne na vȑbah zȕz patȍk. Plȁču võde ke dohȁjaju z pȕči u gorȁh.
Dȃn je vȅdar, tȉh i žȁlosan. Trȃki ud sȗnca ne pȃle vȉše zȅmlju, prikȉdaju se u svȅ kolȏre bȁbinega pȃsa na kȁpljah ud rōsȇ ča he je mãgla puštȉla na lȋšću ud hrȃsta, na klãsu ud pȏljske prȅslice, na barȅti ud mȃha, na trãvi.
Na krȁsi u srȋd Brekoglȃvljega grȃda stȁli su se dȋvi za proslȁvit svȅ uprȁvljeno i za se dogōvorȉt kãko će razdīlȉt mrȅž sȍbon intrȃdu. Njȉhovo vesȇlje je poštȅno i vȇliko – tȅr pȑvi je pȗt ča ȉmaju u rukȁh nȉšto svõje. Slȍbodni su i bugȁti: udbȉli su nȃpad ud gospȏde, a grajȁni su se tornȁli svojȅn dȍma. Pȑvi je pȗt ča su svȉ na kȕpu, ne za dȅlat, nȅg za se veselȉt. Barȉle su njȉn pȕne vĩna ud kamarlȇnga; nosnȉce njȉn gudȉčka udȏr ud pečȅnih prȃzi; njȉhov vȅseli štrmȍr je čȕt po dolȉni ȍkolo. U zȁdnje vrȋme su se na gȗsto kārȁli, pȁlo je gȓdih besȋd, ma danȁs će svȅ to fȉnit. Bȅpo se je pȁk nȉšto pȍčeja činȉt i tãko si je dȍbija neprȇtele u kumpanȉji, ma je on stȅšo čovȉk; tȅr prȅz njȅga ne bi bȋli dȍčkali takȍve dȃne. Je prȁvo ča je sȉja na pȑvo mȉsto kȁko kakȍv gospodȃr. Hlȁpac Liberȁt je sȁda njȉhov pȑvi, ma je Vȇli Bȅpo stȅšo najȁči mrȅž njȉma, pȁk nȅka se mȏmak činȋ.
Dȋvi jȋdu i pȋju. Bȅpo se je zvrnȕja na bȏk, podȕpra je z lȁhton glȃvu, povidȉva po stȏti pȗt za tempurȃ na mȏru i galijȍta Ȋliju. Govȏri kȁko bi bȋlo potrȉbno uzīdȁt grȃd ud grȍte kȁko ča je bȉja unȋ ud bȃna Dragȍnje.
• A, ja! Pȁk da ti zȃjno stȁvimo krȕnu za krãlja. To bȉš ti stȉja! - jāvȉja se je Ȋve, mlȃdi ovčȃr.
• Mȕč! - zagrmȉja je Bȅpo. – Ti si za ȏvce čūvȁt i za nȉš drȕgo!
• Ma, ti jīdȅš mõje ȏvce.
• Ȏvce su ud svȉh nȁs, a čȗvaš he na mojȏj zẽmlji.
• Ja, jȕšto je tvõja!
• Ma, nȅg čigȍva je? Svȁ je zẽmlja u dolȉni mõja.
Bȅpo je razrogȁčija ȍči na pastȋra kȁko da će ga žȋvega progȕtat. Ȋve je umȕka; ti drȕgi su levȁli kȁnat za frmȁt kȃrbu.
Nȉsu stȉli danȁs se kārȁt; sȁmo je Liberȁta i Jurȉća nȉšto i sȁda ždrȍcalo prȍti Bȅpe, pȁk su z očȋ kurajȁli pastȋra. Liberȁt je bȉja srdȉt na Bȅpu aš mu je Branenčȁn ȕzeja zȅmlju u dolȉni. Jurȉć je pȃk govorȉja da ga je Bȅpo kojenȃ i pokrȅja. Zaslīpȉja ga je kȁd mu ni povȉda kolȉko valjȃ zlȃto, a pokrȅja ga je kȁd je špendȃ svȅ šȏlde ke je on, Jurȉć, pȑvi nȁša.
• Ča je hȕje – ukrȅst gȓst mȇsa ili pȕnu jȁmu zlȃta? – zvȋka je Jurȉć. Ma dȋvi ga nȉsu čȕli; grmȉli su sȁda svȉ skȕpa, i kȁnat je grmȉja po klāncȋ ȍkolo gȏre.
Sidȉli su hlȁpci u trãvi i lȋšću zȕz vȍze sȇna blȋzu barȃk, u kȉh je būkȁlo i blējȁlo blȃgo. Ordȇnje ud kampȁnje je ležȁlo ȍkolo njȉh. Brẽki su lȁjali, kõnji ȑzali razvigurȁni z udȏron pokȍšenega sȇna. I starȉji su hlȁpci takȁli povidȉvat svõje stȃre štȏrije. Kolȉko trpljȇnja i patimȇnstva! Kolȉko gȓdega! A õni su svȅ to trpȉli, pūšćȁli da strȉplju na njȉh i he mȕče, imȁli su strȃha ud grajȁni i vȋtezi, ke mȍreš speštȁt kȁko kȇmbare.
• Smȍ bȋli ka i blȃgo!
Bȅpo mučȋ, ma držȋ visȍko glȃvu. To ni vȉše ȕni težȃk ki je nȋdi spȏd motovȗnskih zidȋn čūpȃ i čȅka pečȇnje. Nȉka šuperbȉja i trdȋna stojȋ sȁda dȋvu mrȅž ȍbrvami, a ȍči mu gorȇ. Upijānȉlo ga je življȇnje u slobȏdi, dȅlo i ćūtȉt fȏrcu. U njẽmu se je zbūdȉlo nȉšto ča se ne mȋri z tȉn ča su grajȁni usramȍćeni i ča su gospȏda ȕšla; kȁko da sve ȉšće ȗrtu prȍti ke će se rodȉt fȏrca ča ga gȗši i rȉva za se nažgȁt. Ud nikolȉko vrȉmena on vȉdi da hlȁpci ne držȇ krijȃnciju prȍti njȅmu, da bi svȁki ud njȉh stȉja bȉt na čẽlu ud njȉhove zȃdruge, a to ga bolȋ. Lavudȁju mu da je najjȁči, ma ga ne držȇ za prepȁmetnega. A ki je vȉše ud njȅga dožīvȉja i na tȓden i na mȏru? Ki njȉn je dȍpra ȍči? Bȅpo ima stȅšo ȗfanje da će ga danȁs nagrȃdit i dȁt mu vȅći pȁrat; vȉdit će se kȁda bȕdu dīlȉli kolȉko ga štimȁju.
Sȗnce je bȋlo jȕr visȍko na nȅbu kȁd su se dȋvi najȉli i nakantȁli. Zdȉgli su se za počȇt dīlȉt. Zȃjno kȁda se dīlȉlo drȋvo nikȋ ud njȉh su se rasrdȉli i pȍčeli vīkȁt. Nȁpro tȅško su rivȁli starȉji hlȁpci umīrȉt srdȉte, pȁk su pȍšli na blȃgo, za ko su se debȍto potȗkli. Ȍvčara Ȋvu su morȁli vēzȁt da ne trȕpi na glavȃra Liberȁta. Bȋli su svȉ srdȉti jedȁn na drȕgega, kȁda su se prihȉtili za dīlȉt žȉto i trukȉnju. Bȅpo se je pȑvi razbīsnȉja govȏreć da njȅmu grȇ vȉše.
• Ja sȁn skȍpa i zȍra dolȁc spȏd Štrȋginega brȋga, a dolȁc je napȕnija svȅ nȁše kasũne z intrȃdon. To je svȅ mõja mȕka.
• Mȕčili su se unȋ z grȃda, - rȅka je Liberȁt.
• Pȁk! Sȁn he ja plāćȃ.
• Si, ma z mojȉma bȇči! – zvȋka je Jurȉć.
• Prȁvo govȏri Jurȉć. Ča njȉn je da unȏ zlȃto? Ni bȉlo njigȍvo, - umišȃ se je ȍvčar Ȋve.
• Svȁka čȃs' tȅbi, Bȅpo! – rȅka je stȃri hlȁpac Mȃrko. – Si čovȉk i znȃš z ljȗdi se dogovōrȉt. Ja, dolȁc je da čȕda žȉta, ma su dȅlali unȋ z grȃda. Ti si lȅža i pȉja! Ne govõri da si se čȕda mȕčija. Smȍ mi vȉše nȅgo ti. Svȁka čȃs' tȅbi, Bȅpo! Ma si he plāćȃ z bȇči ud svȉh nȁs. – Ča ni tãko, ljȗdi?
• Vȅro je! Tãko je!
• Tȃti! Barufȃnti! – nȁžga se je Bȅpo i pȍčeja klȇt krvȃv u lȋcu, z natȇgnjenima žȉlami na vrãtu. Njigȍva je dolȉna; on je je zȍra i posȉja. Grajȁni su pretȁli kȁko kȍkoše po njȉvi i zapačīvȁli mu u dȅlu. On he je puštȉja dȅlat i dȁva njin je zlȃto sȁmo da ne vȉše zajȋdaju i da bȕdu u mȋru.
• A ča će ti svȍ to žȉto?
• Ča te brȋga! Ča je mõje – mõje je.
• Volȉja bȉn jȍped slūžȉt gospodãru, rȁje nȅg' tȅbi! – zvȋka je Jurȉć.
Bȅpo se zalȗdo pȉnija. Hlȁpci su ga sȁda glȅdali škȗro, mučȇčni. Branenčȁn je vȉdija da su debȍto svȉ prȍti njȅga i da ga ȉmaju strȃha, pȁk se je jȍš vȉše nȁžga. Potȅka je h barȁki, dȍpra vrȃta, skočȉja na žȉto. Z rukȁmi i z lȁhti pȍčeja je rȉvat i hȉtat zȓnje vȁn z barȁke u ȍblaku ud plȉve i prȃha.
• Na, brẽki! Na vȁn! Mõja mȕka! Mȏj trȗd!
• Si mȗnjen? – vīkȁli su hlȁpci, prȏnti za skočȉt na mȗnjenega.
Bȅpo se je najedanpȗt umīrȉja; zȁša je vȁn z barȁke.
• Dõbro je! Stȅ svȉ prȍti mȅne. Ja grȇn, ma mojȅga žȉta nȇćete godȉt!
*
Tu nȏć je kamarlȇngo Čivȅta glȅda z Štrȋgine glavȉce kȁko vȍganj plamsȃ u Brekoglȃvljen grȃdu. Gorȉle su barȁke i cȅri na krȁju krȁse. Vognjȅni jezȉki su drhtȁli na vȉtru, dȉžuć se svȅ na gȍri, ubližȉvajuć dȁske i slȁmu na krȏvi, a dȗbi su se nažgȉnjali. Grȃd je gorȉja kȁko krȇs na vȓh brȋga.
Ȉskre su letȉle naȍkolo rȉvajuć z dasȃk, z grȃn ud dȗbi. Vȇliki hlȃdi su se uvījȁli ȍkolo vȍgnja. Blȃgo je bižȁlo bȗčuć i blējȗć po strȃni zdȏlu. Čȃp kȏnji nagȁnja je z štȁle, galopȁjuć po strȃni; tȋri ud kopȉti bubnjȁli su po dolȉni; vȉtar je nosȉja dalȅko ȓz ud kȏnji. Glȅdaj, nikolȉko hlȃdi tẽče u dolȉnu, skȃču prȉko kamenjȃra i krȃs – tẽču za nikȉn. U rukȁh su njȉn fašȋni z kȉma mȃšu.
• Bȅpo brȅk! - čȕlo se je vīkȁt u hȗku vȉtra. Hlȃdi su se kalȁli u dolȁc, su se razdvojȉli i ȉšću nikȇga po boškȉci i pȍli patȍka.
Čivȅta sidȋ, glȅda vȍganj i nȅmir u dolȉni. Radȕje se tȅn ča se znenȃda zgodȁlo. Najedanpȗt je čȕja bubnjȁt kȍrake. Visȍki hlȃd je zletȉja sprȋd njȅga. Dȉsa je dimbȍko.
Dȋv, ubȓnjen z živȍton prȍti vȍgnju, u rasprekȉdanoj rȍbi i z lȃsi ki su vijorȁli na vȉtru, zaparȁlo se je Mlȇčanu da je nȉka sȍtona ku je sȃm pakȃ hȉtija vȁn. Čivȅtino se je lȋce zdūžȉlo i zablīdȉlo. Hlȃd je stȃ sprȉd njȅga. Najedanpȗt se je sprȉgnuja, nȉšto zašȁpta i stȇga rȗku, ča se zaparȁlo na svitlavȋni ud vȍgnja kȁko da je svȁ naštrȍpljena ud kȑvi.
• Ki je to?
• Ćȅte mi dȁt vȋna? – zašȁpta je tujȋnac.
• Ti si, Bȅpo? Ča se je zgodȁlo?
• Stȉli su me ubȉt! Ča ćȅte mi dȁt?
Kamarlȇngo je popȅlja dȋva na sunčezahȍdnu bȃndu brȋga. Totȅka se je spȏd brȋga zdȃvna udronȉla pećȉna i dȍprla jȁma.
• Odȅka te ne bȕdu nȁšli, - rȅka je kamarlȇngo.
Čivȅta je pȍša ča, pȁk se vrȇda i tornȃ z mladȉćon ki je nosȉja vȋno.
• Na! Pȋj i povȉdaj.
Bȅpo je sidȉja i glȅda škȗro pridȃse.
• Šašȋni! Sȍtone! Mȅne udrȉt! Ćȅmo vȉdit, bȅn!
Čivȅta je mȕča i čȅka.
• Ki je nȁžga grȃd? – je pitȃ.
• Ja!
• A zȁšto?
• Ukrȅli su mõje žȉto. Stȉli bi mõju mȕku. Svȅ za njȉh! Ča su õni mȅni? Nȉš! Ja sȁn z jenȅga krȁja, a õni z drȕgega. Govȏre kȁko i ja, i to je svȅ...
• A, vȉdiš!
• Su fȍši õni gospȏda, pȁk da njȉn ja slȗžin kȁko hlȁpac?
• Prȁvo ȉmaš!
• A ča je mõje, mȍren i zgorȉt. Ȏni mȅne tȗć, ubȉt? Su hȕji ud grajȁni. U grȃdu su gospȏda, a õni? Hlȁpci, kȁko i ja.
• Da ni bȋlo tȅbe, slūžȉli bi i sȁda gospodārȍn.
• Nȅgo da bi! Sȁd bi õni stȉli da ja njȉn slȗžin. Ću rȁje dȅlat jȍped za gospȏdu. Gospodȉn je gospodȉn, a ča su õni?
• Z nȁs ti je stȅšo bȋlo bȍlje.
• Je gȓda bȋla, ma drugȃšlje. Znȃ sȁn almȅno kȇmu slȗžin. Ča? Liberȁt će bȉt mȏj gospodȃr? Slȕšajte, šjȏr, nȅka mi dȃdu mȏj vȑganj, i vȏz, i matȉku, pȁk ja ne grȇn nȁzad u grȃd. Ću žīvȉt sȃm u dolȉni; sȃm ću dȅlat.
• Dõbro je! Ću pȏjt jȕtri pȍli njȉh.
• Ma, ja bȉn mõju zȅmlju! Dolȁc je mȏj!
• Nȋmaj strȃha.
• Stȅ čovȉk, šjȏr!
I Bȅpo je pȍčeja hrȕštat svõje kumpȁnje. Ȍvčar Ȋve krȇde po njȉvah i tȉra šklȍp u škȍdu. Bȅpo mu je jedanpȗt ubȉja krȁvu pofȁt tȅga u dõlcu, pȁk ga pastȋr mȓzi. Liberȁt se je nalakomȃ na njigȍvu njivu, a mȗnjenen Jurȉću ne da ȕno nesrȉćno zlȍ jȍš vȁjka mȋra. Svȉ su zȁvidni ča je mrȅž njȉma pȑvi, i njigȍvo je žȉto najbravȉje, i njȉgova je trukȉnja najbȍlje rodȉla. Govȏre mu da je ȍhoja i barufȃnte, a svȁki ud njȉh se koporȋ i bi stȉja bȉt za pȑvega, i kȍlju se svȁki dȃn za pȇdalj zemljȇ. Tȗže ga da je pijanȉca, ma Čivȅta dõbro znȃ da je i njȉh vĩno pjēžȁlo.
Kamarlȇngovo je vĩno takȁlo kušeljȁt u Bȅpi, a dȋv je pȍčeja frfoljȁt za krãlja Dragȍnju, za galijȍta Ȋliju, za slobȏdu za ku bi da i kȓv.
Ȍkolo pȏ nȍći dȋv je zȁspa; kamarlȇngo se je tornȃ u barȁku.
Sunčestȍk je bȉja ud pozȋmka kȁd se je Čivȅta ustȃ i pȍša dȍli u dolȉnu.
*
Dȋvi su po dolȉni iskȁli rastrešȅno blȃgo i kõnje, skūpljȁli su he i tȉrali prȍti grȃdu. Bȋli su uklepȕšeni, speštȁni ud mižȇrije i tȗge.
• Bȏg dȃj zdrȃvlje, šjȏr! – pozdrȁvljali su hlȁpci kamarlȇngu, a glȃs njȉn je bȉja mȅk i tȉh, lȋca krȍtka.
• Bȏg dȃj, ljȗdi! Ča vȁs je to kapitȁlo?
• Zlȍ je! Bȅpo nȁn je nȁžga grȃd.
• Ma, kãko to? Zȁšto?
• Ȅko, tãko! Smȍ se svȁdili, pȁk je Bȅpo pȍša u dolȁc. Vrnȕja se je po nõći i svȅ nȁžga.
• Pȁk, onipȗt?
• Vȉdili su ga ljȗdi, pȁk su ga stȉli ubȉt, ma njȉn je ȕša. Svȅ je zgorȉlo. Hȍte z nȁs, pȁk ćȅte vȉdit.
I hlȁpci su popeljȁli kamarlȇnga u grȃd.
Na zgorȅnen je još dimȉlo. Kȍpe zgorȅnega žȉta ležȁle su jȕšto tȁmo kadȉ su se jȍš učȇra dȉzale barȁke. Nikolȉko grȇd ud nikadȃnjih štȃl držȁlo se je jȍš za zgõru na vȉtru. Vȁmo-tȁmo po krȁsi su ležȁle na pȏ zgorȅne crkȍtine ud kȏnji i vȏli, a ȍkolo njȉh su se motȁli brẽki. Ćȃpi vrȃn pokūpljȁli su se škrgutȁjuć na unȅn ča je ustȁlo ud barȃk i štȃl; čȅkali su da se ljȗdi mȁknu ča z brȋga, ȅli da njȉn hȉte crkȍtine u dolȁc spȍd grȃda. Dȇbla ud cȅri stšȁla su u vȋs. Svȅ je bȋlo lȕgasto ud lȗga, čȓno ud dȋma i sȃj.
• A ča ćȅte sȁda?
• Ćȅmo kaštigȁt unȅga bandȉta ki je svȅ nȁžga, - rȅka je hlȁpac Liberȁt.
• A ki vȁn je za pȑvega?
• Ja sȁn.
• Vi stȅ to puštȉja?
• A ča ću ja kȁd me ne slȕšaju? Svi su pȍredni, a Bȅpo je najhȕji. Dȅlaju i mȕče se, ma su kȁko mȗnjeni – pȁk ne grȇ.
• Sȁn rȅka ja, - pȍčeja je hlȁpac Tȏma, - da je to mȉsto prȍkljeto. Posvȕda su kȍsti. Pȁk to zlȃto, pȁk zȋdi! Ja govȏrin cȋlo vrȋme nȅka grȇmo na kakȍvu drȕgu gȏru.
• Ne, to ne! Zẽmlja je bȍjža. Nȅgo čȗjte, šjȏr, - rȅka je stȃri hlȁpac Ȋve – mi nȋmamo jȕštega čovȉka ki bi nȁs pȅlja. Mi smȍ dȏbri za dȅlat, ma mi smȍ brȋžni hlȁpci. Bi nȁn se stȉja čovȉk pȁmetan, študijȁn, ki bi nȁs lȋpo pȅlja i rȅka nȁn ča i kãko, i kȇga bȉmo štimȁli i kuntȇnto poslȕšali. Unipȗt bi svȅ bȋlo dõbro i ne bi se takȍve stvȃri dogājȁle. Ma uvãko, ča nȁn korȉsti imȁt slobȏdu?
• Vȅro, ja! Govȏri jȕšto ka i čovȉk!
• I ja pensȃn da je tãko! – rȅka je Čivȅta. – Vȁn bi trȉba jedȁn za pȑvega, i to jȕšti.
• A ča bi bȋlo kȁd bȉte Vi dȍša h nȁn i bȉja nȁš pȑvi?
• Ja? – zaštȕpija se šȅgovi Mlȇčan. – Ča vȁn je to pȁlo na pȁmet? Nãjdite ga mrȅž vȁs.
• Mi nȉsmo za to. Dȃjte Vi! – Ćȅte vȉdit kȁko ćȅmo dȅlat unipȗt.
Čivȅta se je svȅ koporȉja kȁko da ne bi, a kušeljȃ je tãko da he je svȅ vȉše potȅza da bȕdu tȑdi u njȉhovoj žȅlji. Pȍkle dȕgega tentȃnja, kamarlȇngo je pȍčeja popūšćȁt. Pȍšto su mu ubećȁli da će ga za sve poslȕšat, se je složȉja i njȉn je da besȉdu da će š njȉma kȁko z ljȗdi ki su lȉberi. Prošētȃ je jȍš jedanpȗt po krȁsi, pȁk rȅka nȅka hȉte ča ȕne mȑcine, glȁmnje i lȗg u klānȁc i da posȋču po bȍški drȋvo za dȁske za nȏve barȁke. Njȉhovo blȃgo ni čȕda potrpȉlo, pȁk ne trȉba strahovȁt ud glȃdi. Za ki dȃn će razdīlȉt svȉ skȕpa zȅmlju i počȇt kȑšit bȁred i orȁt. On će dȏjt svȁko jȕtro do njȉh. Rȅka je nȅka pȕšte na mȋru Bȅpu, kȇga će on sȃm pȏjt iskȁt. Dȋvi su se utȉšili i kumpanjȁli su svȅ do dolȉne svojȅga nȏvega glavȃra.
• Zalȗdo! – rȅka je hlȁpac Liberȁt. – Šjȏr je šjȏr.
• Ma i vrȃga, sȁmo ne Bȅpu!
• Kȁko je svȅ zȃjno lȁglje kȁda ti ki zapovȋda!
I tu su vȅčer dȋvi jȍped pȋli i kantȁli na upustȏšenen vȓhu Brekoglȃvljega brȋga.
*
Čȓni su glȃsi dohȁjali do kamarlȇnga.
Poručȉva mu podeštȁt da grajȁni rȁje gladȕju nȅg će dȁt Bȅpine šȏlde, z kȉma bi on kūpȉja hrȃnu. Motovȗnska je bȍška pȗsta i prȏto Dȁlla Zȏnta se zalȗdo mȕčija nȃjt dȅlavce u grȃdu. Senȁt z Venecȉje je pȍsla lȅteru, prigovȃra i prȋti motovȗnskoj komȃndi. Grajȁni za to mȃre i ne mȃre. Blagȃjna ud kȍmuna je prãzna, a Motovȗnci trapulȉvaju z unȉn prȍkljetin zlȃton. Po njȉvah se ne ȍre, ni kȍpa. Za ki dȃn nȇćeš nȃjt ni kȍre krȕha u Motovȗnu. Zagospodārȉla je barȕfa. Gospȏda su se prihȉtila u farabȕte. Dȃli su orȗžlje hlȁpcan, pȁk munjȇsaju po sȅli prȋteć da će stȁvit tȁše na grȃde. Najvȉše je pȍčeja bȉt pȍredan Ȏdo Waksenštȃjnski. Svȅ je pobȉglo u grȃd da ne poumȉru ud glȃdi ȅli mȁča, a u Motovȗnu je hrãna pȍšla gȍri kȁko ȍko u glãvi. Svȅ ča je bȋlo vȋna u konȍbi ud grȃda, svȅ mu kuntȇnto šȁlje, aš bi bȋla gȓda ko bi se lȁčni grajȁni hȉtili na pȋće i zaplēsȁli pijȁno kȍlo. Podeštȁt mȍli kamarlȇnga da pȕšti ȕne dibljȃke i dotȇče u Motovȗn, kȁdi će bȉt svȉn ud korȉsti.
Čivȅta, zȃjno kȁd je dȍbija vĩno, popȅlja je vȏz do dȋvi i da njȉn ga za blȃgo. Tu svȇnu vȅčer porūčȉja je kamarlȇngo podeštȁtu da mu, ȅko, šȁlje blȃgo, a da će do mȁlo Motovȗncan poslȁt jȍš lȉplji dȃr. On će ustȁt na Štrȋginoj glavȉci. Nȅka se podeštȁt tȉši i nȋma strȃha ud glȃdi dȍk je vȍli i ovȃc na Brekoglȃvljen brȋgu. I ud tȅga dȃna prodȁva je Čivȅta dȋvan svȅ drȁžlje vȋno. Zlȃtna jȁma je bȋla vȅć prȃzna. Zalȗdo su hlȁpci rȏmpali z matȉkami i kopȁli škȕlje. Najedanpȗt su skopȁli dimbȍku jȁmu i naletȉli na špȋlju u kȏj se je na dnõlu nȉšto svitlȉlo. – Zlȃto! – zaškičȁli su i rȉnuli kȁko jedȁn čovȉk za se provȗć krȍz prȏlaz. U nȁpro tȋsnen nastȁla je bȏrba ud dȋvi. Ulovȉli su se u krȉk; gušȉli su se z pȕnjami, tȗkli z nogȁmi. Borȉli su se sakramȇnski dȍkle nȉsu upȁzili da unȏ ni zlȃto, nȅgo kȕp pečȕrak ča su se laštȉle u ȕmidnoj škurȉni.
Ȍvčar Ȋve se je proslȁvija kȁko pijānȁc. Krȅja je drȕgin blȃgo i dȁva ga kamarlȇngovoj drȕžbi; võla za po brȇnte vĩna. Debȍto svȁki trȇti dȃn gonȉli su grajȁni võle i ȏvce u Motovȗn i drȕge grȃde. – Dȋvi su jȍped hrānȉli, a da tȅga nȉsu nȁnke znȁli, svȁ mȉsta u blizȋni. Blȃgo je hodȉlo na mȁnje, a hlȁpci su nȉšto drȕgo pensȁli. Počekȉvali su dȃn kȁda će njȉn Čivȅta razdīlȉt zȅmlju, pȁk su vȅć po tȅn pȍčele kȃrbe i barȕfe. Kamarlȇngo je fatepȍšte puštȉja da pasȁju dȃni i šetimȃne. Ložȉja je kȃrbu. Ljȕca he je, ȁli vȁjka z mȅdon na jezȉku, govȏreć njȉn za slȍštinu. – Sȁmo je Bȅpu na dȍprto ljȕca na bȗnu; tȉra ga je da tornȃ svojȉn kumpȁnjan ča njȉn grȇ. A Branenčȁn se je udalȅčija u dolȉnu. Dȅla je mȁlo i dohȁja se pȍli Čivȅte zlȁjat. Čivȅtina kumpanȉja ga je dočekȉvala z počȇtka lavudȉvajuć mu, vȋčuć i gȍsteć ga z nȉkin strȃhon, ma – ča se je dȋv vȉše hȉta u lakodȇljstvo, fȃlu sȃmega sȅbe i u pȉt – su õni bȋli porednȉji prȍti njȅn. Bȅpo se je z nȏva navȁdija na to. Ni se vȉše sdȉja ča gospȏda ž njȉn jȍped mȗnjeno škercȁju: - tȅr õni mu lavudȉvaju svȁku besȉdu kȁda govȏri gȓdo za unȇ u grȃdu.
Pȅna ȍkoli Božȉća zaparȁlo se je Čivȅti da je dȍšlo vrȋme hȉtit mrȅž seljȃke jȁbuku ud barȕfe.
Rȁno z jȕtra kalȃ se je kamarlȇngo u grȃd, pȍzva je hlȁpce i jāvȉja njȉn da će razdīlȉt zȅmlju.
Pȇt dȃn su svȉ skȕpa ubajdȉvali brȋge i dolȉne mȉreć njȉve, stȁvljajuć kunfȋne, prȁvdajuć se za svȁku grȍtu. Čivȅta se ni nȃdija da će naletȉt pȍli hlȁpci na takȍvu ingordȉju za zemljȏn. Osvidȍčija se je da mu ni potrȉbno načinȉt dilȉdbu na takȍvu fȏzu da se pȍkle jȍš gȑžlje poprȅhtaju mrȅž sȍbon. Dȍsta je da su susȅdi, pȁk će se svȁdit, za svȁku grȕdu, za svȁki grmȉć. – Najtȅže je bȋlo z dolȉnon mrȅž Brekoglȃvljega brȋga i Štrȋgine glavȉce.
• Pũštimo je Bȅpi, - rȅka je kamarlȇngo, - on je je i do sȁda kȍpa.
Ma, su se hlȁpci razbīsnȉli. To je najbravȉja zẽmlja. Bȅpo je je ukrȅja drȕgin šašȋnski. Dvȃ se je dȃna Čivȅta mȕčija š njȉma, dȍkle ni rȅka da će po dolȉne bȉt za Bȅpu, a drȕga polovȉca za Liberȁta i stȃrega Mȃrku. Kamarlȇngo je znȃ da će jȕšto ta dilȉdba postȁt pȍkle vȇlika nevȍlja.
Čivȅta je napīsȃ za svȅ ča su se dogovrȉli dȋleć, trȕpija je tȋmbar i stȁvija sprȋda dȋvi debȅli lȉbar na kȅn se je vȉdija krȋž ud srȅbra.
• Zakȗnite se na tȅn lȉbru i ne tȅn krȋžu da ćȅte se držȁt kuntrȁta i da ćȅte poštȋvat tȕje.
I dȋvi su se zȁkleli.
Tu svȇnu vȅčer rȅka je Čivȅta Bȅpi ki je pȁrat dolȉne pripȃ njȅmu, a ki Liberȁtu i Mȃrki. Dȋv je zablīdȉja; ȕsnice su mu zadrhtȁle.
• Ja nȉsan bȉja z vȁs. Ja ne znȃn nȉš! Dolȁc je mȏj.
• Bȅpo, i ti morȃš poslȕšat. Dilȉdba je načȉnjena.
• Ja se nȉsan zȁkleja.
Čivȅta je pȍčeja govrȉt dȋvu kȁko hlȁpci kušeljȁju da su bȋli premȅki prȍti njȅmu; uprostȉli su mu zlȏčin, dȃli su mu najbȍlji pȁrat dolȉne.
• Ni pravȋce, - rȅka je Čivȅta, - ma sȁn imȃ strȃha da će bȉt i hȕje. Ča ćȅš? Njȉh je dvȁjset, a ti si sȃm kȁko mȕlac. Rȃbi pasȁt prȉko svȅga!
Branenčȁn je skočȉja na nȍge i potȅka u dolȉnu.
Manje poznate beside:
barȉla – manja drvena bačvica za vino
barufȃnti – svađalice, huškači
bȇči – novac
farabȕti – spletkaroši, nevaljalci
hrȕštat – ogovarati
ingordȉja – pohlepa
kampijȏn – ogledni primjerak, uzor
kȃrba – svađa
kasȗn – sanduk
kȃva – rudnik
kȇmbar – hrušt
kȍpa – stijeg
krijȃncija - poštovanje
kuntrȁt – ugovor, dogovor
lavudȁt – potvrditi
lavudȉvat – potvrđivati
leprȉn – veprina
lȗg – pepeo
ljȕcat – huškati
patimȇnstva - patnje
plȉva – pljeva, sitne ljuščice žitnoga zrnja u vršidbi
pozȋmak – jesen
sȁje – čađa
strnȉšće – strnište, ostatak žita poslije žetve
šašȋni – ubice
špašiđȇri – putnici
štȑped – grm
švȋb – grm iz poriodice drenova
tȁša – porez
tȃti – lopovi
ȕmidno – vlažno